Road Accident Death in Goa : मागील काही महिन्यांपासून गोव्याला अपघातांचे जणू ग्रहणच लागले आहे. रस्ते अपघातांचे सत्र काही केल्या थांबण्याचे नावच घेत नाही. दिवसेंदिवस या घटना आणि या घटनांमध्ये होणारे मृत्यू, जखमी होण्याचे प्रमाण वाढतच चालले आहे.

काही वेळापूर्वी घडलेल्या अपघातात एका दुचाकीस्वाराचा दुर्दैवी जागीच मृत्यू झाला आहे.

मिळालेल्या माहितीनुसार, गणेशपुरी, म्हापसा- मार्ना रस्त्यावर हा अपघात घडला आहे. रिक्षा टेम्पो आणि एका दुचाकीमध्ये जोरदार टक्कर झाली. ही धडक इतकी भीषण होती की यामध्ये दुचाकीस्वाराचा जागीच मृत्यू झाला आहे.

तर यामध्ये दुचाकीवर मागे बसलेला एकजण गंभीर जखमी झाला आहे. त्याला सध्या उत्तर गोवा जिल्हा रुग्णालयात दाखल करण्यात आले असून त्याच्यावर उपचार सुरू आहे. पुढे त्याला GMC मध्ये दाखल करण्यात येणार असल्याचे सांगण्यात येत आहे. पोलीस या घटनेचा पुढील तपास करत आहेत.

दुसरीकडे, अटल सेतूवर काल (गुरुवार) रात्री एक माल वाहतूक करणाऱ्या ट्रकचे नियंत्रण सुटले आणि तो ट्रक एक बाजूला कलंडला.

दरम्यान, काल अपघाताची एक विचित्र घटना समोर आली होती. शिरसई येथे स्वयंअपघातानंतर चारचाकीत अडकून पडलेल्या जखमी चालकास अग्निशमन दलाचे जवान तसेच पोलिसांनी अर्ध्या तासाच्या प्रयत्नांनंतर गाडीतून बाहेर काढले. या अपघातात वाहनचालक गंभीर जखमी झाला असून तो म्हापसा फायर स्टेशनचा कर्मचारी आहे. या अपघातात गाडीच्या दर्शनी भागाचा चक्काचूर झाला.