Goa Crime : मुले पळविणाऱ्या टोळीतील सदस्य गोव्यात फिरत आहेत या अफवेचा लोकांवर एव्हढा परीणाम झाला आहे की कुणालाही मुले पळविणारा असे समजून मारहाण करण्याचे प्रकार वाढले आहेत. वास्को येथे अशाच गैरसमजातून एका मनोरुग्णाला मारहाण करण्याची घटना ताजी असतानाच काल बेतालभाटी येथे एका निष्पाप बिगर गोमंतकीय मजुराला स्थानिकांनी मारहाण केली.

या घटनेचा व्हिडिओ सध्या व्हायरल झालेला असून त्यात या मजुराचे हातपाय बांधून घालून लोक त्याला मारहाण करताना दिसतात. या संबंधी कोलवा पोलीसांनी अज्ञाता विरोधात गुन्हा नोंद केला आहे.

मिळालेल्या माहितीनुसार सदर मजूर झारखंड येथील असून त्याचे नाव शानू साहू असे आहे. काही दिवसा पूर्वीच तो एका ट्रॉलरवर काम करण्यासाठी गोव्यात आला होता. काल बुधवारी तो गावात फेरफटका मारायला बाहेर पडला असता तो वाट चुकला. भांबावलेल्या अवस्थेत तो एकाचा परसात घुसला. त्याचवेळी कुणीतरी मुले पळविणाऱ्या टोळीतील हा सदस्य असल्याची हुल उठविल्यावर लोकांनी त्याला यथेच्छ चोपले.

या कामगाराला हिंदी भाषाही धड येत नसल्याने लोकांचा गैरसज अधिकच वाढला. शेवटी कुणीतरी कोलवा पोलीसांना ही खबर दिल्यावर पोलीस तिथे आले आणि त्याला ताब्यात घेतले.
काही दिवसापूर्वी मोती डोंगरावरही अशाच गैरसमजातून स्थानिकानी एका युवकाला मारहाण केली होती. त्यानंतर वास्को येथे अशी मारहाणीची घटना घडली.

वास्को येथे तिघांना अटक

मुले पळविणारा असे समजून वास्को येथे एका मनोरुग्णाला मारहाण करणाऱ्या तिघांना आज वास्को पोलिसांनी अटक केली. दक्षिण गोव्याचे पोलीस अधिक्षक अभिषेक धनीया यांनी ही माहिती दिली. याही घटनेचा व्हिडिओ व्हायरल झाला होता त्या व्हिडिओ वरूनच या तिघांची ओळख पटली.

मडगावात सुरक्षा रक्षकाला अटक

एक भिकारी परत परत हाकलूनही जात नाही यामुळे त्याचा त्रास वाचविण्यासाठी त्याला मुले चोरणारा म्हणून पोलीसांच्या स्वाधीन केलेल्या हॉस्पिसिओ इस्पितळाच्या सुरक्षा रक्षकाला फातोर्डा पोलिसांनी खोटी माहिती प्रसारित करत असेलल्या आरोपाखाली अटक केली. त्यानें मुद्दामहुन पोलिसांना खोटी माहिती दिली होती.