मोरजी: ओंकार हत्तीने गेल्या चार दिवसांपासून कडशी–मोपा परिसरातील शेती आणि बागायतींचे नुकसान चालवले असताना आता तो चक्क लोकवस्तीत घुसत असल्याने, तसेच पाठलाग करत असल्याने लोक दडपणाखाली आले आहेत. यामुळे एखादी मोठी दुर्घटना घडण्याची शक्यता वर्तवली जात आहे.

येथील पंच दयानंद गवंडी यांनी ओंकार हत्तीचा तातडीने बंदोबस्त करावा, अशी मागणी केली. सरकारने आतापर्यंत केलेल्या उपाययोजना कुचकामी ठरल्या आहेत. एखादी दुर्घटना घडण्याची वाट सरकारने पाहू नये.

तसेच नुकसानग्रस्तांना त्वरित नुकसानभरपाई देण्यात यावी, अशीही मागणी त्यांनी केली.ओंकार हत्तीने मागील चार दिवसांपासून कडशी–मोपा भागात बस्तान मांडले असून शेती-बागायतींचे नुकसान करत आहे. तसेच तो लोकवस्तीत शिरून मोडतोडकरीत आहे.

पेडणे वन खात्याच्या कर्मचाऱ्यांना चकवा दिलेल्या ओंकार हत्तीला शोधून काढण्यात अखेर यश आले. हा हत्ती कडशी, मोपा परिसरातील जंगलात आढळून आला. तेरेखोल नदी आणि आसपासच्या भागात त्याचा शोध घेण्यात आला. त्यानंतर मोपा, उगवे, तांबोसे भागातील काजू बागायत शोध घेण्यात आला. अखेर हा हत्ती कडशी येथील जंगल परिसरात सापडला. वन कर्मचारी त्याच्यावर नजर ठेवून आहेत, असे वन अधिकारी महाले यांनी सांगितले.