पणजी : गोव्यात कोरोना संसर्गासोबतच ओमिक्रॉन व्हेरिएंटचे रुग्णही सापडू लागले आहेत. गोवा राज्यासाठी ही धोक्याची घंटा मानली जात आहे. गोव्यात बुधवारी आणखी 8 जणांचे अहवाल ओमिक्रॉन (Omicron Cases in Goa) पॉझिटिव्ह आल्याने एकच खळबळ उडाली आहे.

काल बुधवारी पुण्यातील एनआयव्हीमधून हे अहवाल पाठवण्यात आले आहे. गेले कित्येक दिवस हे अहवाल प्रलंबित होते. ओमिक्रॉन (Omicron Variant) पॉझिटिव्ह आलेल्या तिघांची ट्रव्हल हिस्टरी असून इतर पाचजण गोव्यातील रहिवासी आहे. धक्कादायक बाब म्हणजे पाचजणांची कोणतीही ट्रव्हल हिस्टरी नसल्याने समूह संसर्गाचा धोका आणखी बळावला आहे.

दरम्यान गोव्यात (Goa) 8 ओमिक्रॉन व्हेरिएंटसह तब्बल 1002 जणांचा कोरोना अहवाल पॉझिटिव्ह आला आहे. त्यामुळे गोव्यात कडक निर्बंध (Restrictions) लादण्याची मागणी आता वाढू लागली आहे. गोव्यात सापडलेला पहिला ओमिक्राँट व्हेरिएंटचा रुग्ण हा आठ वर्षाचा लहान मुलगा असल्याने शाळा बंद करण्याची मागणीही जोर धरत होती. आता शाळा बंद करण्याचे आदेश शालेय शिक्षण विभागाने दिले आहेत. मात्र शाळा (School) बंद करण्यातील दिरंगाई मुलांसाठी धोकादायक ठरण्याची भीती व्यक्त केली जात आहे.