Galajibag Beach: गोंद किनाऱ्यावर बुधवारी सागरी कासवाने घातलेली 89 अंडी गालजीबाग किनाऱ्यावर स्थलांतरित करण्यात आली आहेत. गालजीबाग किनाऱ्यावरील कासव संवर्धन केंद्रातील हे दुसरे सागरी कासवांच्या अंड्याचे घरटे आहे.

यापूर्वी 18 डिसेंबरला पहिल्या सागरी कासवाचे तळपण किनाऱ्यावर आगमन होऊन त्याने 93 अंडी घातली होती. काणकोणातील गालजीबाग व आगोंद किनारे सागरी कासवांसाठी आरक्षित आहेत. गालजीबाग किनाऱ्यालगतची जमीन सागरी कासवांच्या आरक्षणासाठी वनखात्याने संपादित केली आहे.

कमर्शियल झोनची निर्मिती कशासाठी ?

गतवर्षी आगोंद किनारी 30 कासवे आली होती, तर गालजीबागवर 11 कासवांनी अंडी घातली होती. वन खात्याने उत्तर व दक्षिण अशी दोन मरीन झोन केली आहेत. गर्दीचा किनारा असूनही आगोंद वर लक्षणीय ऑलिव्ह रिडले अंडी घालण्यासाठी येतात.

कमर्शियल झोनची अधिसूचना काढून कासवांनाच येथून हद्दपार करण्याची भूमिका सरकारने घेतलीय का, असा प्रश्न येथील पर्यावरण प्रेमींना पडला आहे.

झोनचे मुख्यालय गालजीबाग किनारा असल्याने आगोंद येथील सागरी कासवांनी घातलेली अंडी सुरक्षिततेच्या दृष्टीने गालजीबाग किनाऱ्यावर स्थलांतरित करण्यात आली आहेत. गतवर्षी१३ जानेवारीला प्रकाशित अधिसूचनेत मोरजीसह आगोंद व्यावसायिक झोन म्हणून जाहीर केले होते. त्यामुळे हे स्थलांतरण करण्यात आले आहे. 1999 पासून हे किनारे सागरी कासवांसाठी आरक्षित आहेत. - विवेक गावकर,दक्षिण मरीन झोनचे क्षेत्रिय वनाधिकारी