Kadamba bus viral video: जुन्या गोव्यात फेस्ताचा उत्साह असताना बुधवारी (दि.०३) जुने गोव्याच्या उड्डाणपुलाखालील वाहतूक पूर्णपणे थांबली होती, कारण एका कादंब बस चालकाला वाहतूक पोलिसांनी अडवले. हा बस चालक गाडी चालवताना कथितरित्या मोबाईल फोनवर बोलत होता. सध्या हा व्हिडीओ सोशल मीडियावर बरच व्हायरल होत आहे.

चालकाचा वाद, प्रवाशांचा खोळंबा

हा प्रकार नियमभंगाच्या सामान्य तपासणीसाठी पोलिसांनी बस थांबवल्याने सुरू झाला, पण बघता बघता याचे रूपांतर चालक आणि पोलीस अधिकारी यांच्यात जोरदार वादात झाले. हा वाद रस्त्याच्या मधोमध सुरू झाल्यामुळे, या व्यस्त मार्गावर वाहनांची मोठी रांग लागली आणि सर्वसामान्यांची मोठी गैरसोय झाली.

चालकाने वाहतूक पोलिसांशी केलेल्या तणावपूर्ण वादामुळे अनेक प्रवाशांना रस्त्यावर थांबावे लागले. या गोंधळामुळे जुन्या गोव्याच्या फ्लायओव्हरखाली बराच काळ वाहतूक ठप्प झाली होती.

अखेरीस, परिस्थिती नियंत्रणात आणण्यात आली आणि वाहतूक पूर्ववत झाली. मात्र, वाहतूक नियमांचे उल्लंघन केल्याबद्दल आणि रस्त्यावर गोंधळ निर्माण केल्याबद्दल संबंधित बस चालकावर कठोर कारवाई होण्याची शक्यता अधिकाऱ्यांनी व्यक्त केली आहे.