Old Goa Company : पणजी, ओल्ड गोवा ऑईल्स अँड फूडस्‌ प्रायव्हेट लिमिटेडचे चेअरमन परेश शेटगावकर यांनी अलीकडेच सौदी अरेबिया येथे तीन विविध कंपन्यांशी सेंद्रीय तेल, बॉडी ऑईल, खोबरेल तेल यासाठी निर्यात करारांवर स्वाक्षऱ्या केल्या असल्याची माहिती एका प्रसिध्दीपत्रकात देण्यात आली आहे.

सौदी अरेबिया येथे २३ ते २६ ऑक्टोबर या कालावधीत आयोजिण्यात आलेल्या ४० व्या सौदी कृषी एक्स्पो २०२३ या प्रदर्शनादरम्यान त्यांनी विताल फार्मास्युटीकल, मिक्स सायन्स व आर्ताल ॲडव्हान्स्ड कंपनी यांच्याशी हे करार केले आहेत.

या करारांमुळे गोव्यातील नारळ, मीठ, मिर्ची उत्पादक शेतकऱ्यांना लाभ मिळणार असल्याचे या पत्रकात नमूद करण्यात आले आहे.

या करारांपैकी सर्वात मोठा करार मिक्स सायन्स या कंपनीबरोबर करण्यात आला आहे. या कराराखाली ओल्ड गोवा ब्रँडची १००.००० यूएसडी किमतीची उत्पादने दर महिना निर्यात केली जाणार आहेत आणि मागणीनुसार कराराचे प्रमाण वाढणार आहे.

शेटगावकर यांच्या कंपनीच्या या नाविन्यपूर्ण उत्पादनांना सौदी अरेबियातील व्यावसायिक आस्थापनांकडून चांगला प्रतिसाद लाभला आहे अशी माहिती देण्यात आली आहे. नारळाच्या झाडांसह निसर्ग संवर्धनालाही यामुळे हातभार लाभणार आहे.