पणजी: गोवा विद्यापीठातून एक खळबळजनक प्रकार समोर आला आहे. विद्यापीठात आयोजित करण्यात आलेल्या फॅशन शोमध्ये विद्यार्थ्यांनी (मुले) चक्क अंडरवेअरमध्ये परेड केल्याची धक्कादायक प्रकार घडला आहे. याप्रकरणाची अंतर्गत चौकशी सुरु असताना आता गोवा मानवाधिकार आयोगाने देखील याची दखल घेतली असून, आयोगाने विद्यापीठाला नोटीस बजावली आहे.

गोवा विद्यापीठात चार महिन्यांपूर्वी ‘फ्रॉलिक’ हा सांस्कृतिक कार्यक्रम आयोजित करण्यात आला होता. या कार्यक्रमात विद्यार्थ्यांनी एका सेगमेंट अंतर्गत चक्क अंडरवेअरमध्ये वॉक केला. विद्यापीठाच्या शिस्तपालन समितीने या प्रकाराची गंभीर दखल घेतली आणि प्रकरणाची अंतर्गत चौकशी सुरु करण्यात आली. 

विद्यापीठाच्या शिस्तपालन समितीचा अहवाल येत्या सोमवारपर्यंत कार्यकारी मंडळासमोर मांडला जाण्याची शक्यता आहे. दरम्यान, आता या प्रकरणाची गोवा मानवाधिकार आयोगाने देखील गंभीर दखल घेतली असून, विद्यापीठाला थेट नोटीस पाठवली आहे. कुलुगुरुंना याप्रकरणी येत्या २३ जुलैपर्यंत आयोगासमोर सविस्तर अहवाल सादर करावा लागणार आहे.

चार महिन्यांपूर्वी विद्यापीठात फ्रॉलिक सांस्कृतिक कार्यक्रम आयोजित करण्यात आला होता. घडलेल्या घटनेनंतर मोठ्या प्रमाणावर नागरिकांनी आक्षेप व्यक्त केला होता. दरम्यान, आता आयोगाने देखील याची दखल घेतली आहे.