मडगाव: नुवे चर्चजवळ गुरुवारी सकाळी दोन दुचाकींची समोरासमोर धडक होऊन झालेल्या अपघातात आंतोनियो रॉड्रिग्ज (रा. नुवे) यांचा उपचारादरम्यान मृत्यू झाला, तर गिरीश कारेकर हे जखमी झाले.

पोलिसांनी दिलेल्या माहितीनुसार, गुरुवारी सकाळी १०.३० वा.च्या सुमारास आंतोनियो हे होंडा अ‍ॅक्टिव्हा स्कूटरने जात होते. नुवे चर्चजवळ वेर्णाच्या दिशेने जाण्यासाठी त्यांनी उजवीकडे यू-टर्न घेतला. यावेळी नुवेकडून वेर्णाच्या दिशेने जाणाऱ्या गिरीश कारेकर यांच्या हिरो माएस्ट्रो स्कूटरला त्यांच्या दुचाकीची धडक बसली.

दोघेही रस्त्यावर पडून जखमी झाले. आंतोनियो यांना दक्षिण गोवा जिल्हा रुग्णालयात दाखल केले असता उपचारादरम्यान त्यांचा मृत्यू झाला. याप्रकरणी मायणा-कुडतरी पोलिसांनी गुन्हा नोंदवला असून, उपनिरीक्षक नारायण पिंगे तपास करीत आहेत.