Goa Assembly Session 2024: देशात आता रामराज्य आले असून, अयोध्येत रामलल्लाची स्थापना झाली आहे. त्यामुळे तुम्हाला घाबरण्याची गरज नाही, असे आश्वासन मुख्यमंत्री प्रमोद सावंत यांनी विरोधी पक्षनेते युरी आलेमाव यांना सभागृहात दिले.

राज्यपालांच्या अभिभाषणावर उर्वरीत सदस्यांनी भाष्य केल्यानंतर त्याला मुख्यमंत्री सावंत उत्तर देत असताना त्यांनी हे वक्तव्य केले.

मुख्यमंत्री उत्तर देत असताना आलेमाव यांनी मध्येच प्रश्न उपस्थित केल्याने, "तुम्ही बोलत असताना मी शांतपणे ऐकत होतो, मी बाहेर गेलो तरी माझं लक्ष तुमच्याच बोलण्याकडे होते. तुम्ही विरोधी पक्षनेते असल्याने तुमचे ऐकावंच लागेल, नाही ऐकलं तर उद्या तुमच्या प्रश्नांना उत्तर दिले नाही असे होईल," असे प्रमोद सावंत म्हणाले.

"आणि आता रामराज्य स्थापन झाले आहे. रामलल्लाची स्थापना झाली असून खऱ्या अर्थानं रामराज्य प्रास्थापित झाले आहे, त्यामुळे तुम्हालाही घाबरण्याची गरज नाही," असे मुख्यमंत्री सावंत म्हणाले.

तसेच, आमच्या सरकारच्या काळात आम्ही जी गॅरंटी देतो ती पूर्ण करतोच कारण ती मोदींची गॅरंटी आहे, असेही सावंत यावेळी म्हणाले. मागील दहा वर्षातील इतिहास पाहता तुमच्या लक्षात येईल, असेही सावंत यांनी सांगितले.

राज्यात राबविण्यात येणाऱ्या विविध योजना लोकांपर्यंत कशा पोहोचतील यासाठी आम्ही प्रयत्नशील आहोत. अलिकडेच कुंक्कळीत उद्घाटन झालेल्या एनआयटी सारख्या संस्थांचा फायदा गोव्यातील विद्यार्थ्यांना होईल.

तसेच, येथे निर्माण होणाऱ्या रोजगार संधी कुंक्कळीकरांना दिली जाईल, असेही आश्वासन सावंत यांनी यावेळी दिले.