मोरजी : मांद्रे मतदार संघातील जनतेने आपल्यावर जो विश्वास ठेवून आपल्याला आमदारकी दिलेली आहे. निवडणुकीपूर्वी आपण जी जी आश्वासने जनतेला दिलेली आहेत. ती पूर्ण करणार असल्याचे सांगून आता राजकारण बाजूला ठेवून आम्ही समाजकारण करूया,असे आमदार जीत आरोलकर यांनी सांगितले. आपल्याकडे आलेल्या व्यक्तीच्या समस्या सोडवणार शिवाय आपण कधीच तो अमुक पक्षाचा तो तमुक पक्षाचा हे पाहणार नाही.

आपल्याला केवळ समाजकारण करायचे आहे. पाच वर्षानंतर राजकारण पुन्हा करू,असही ते म्हणाले. पार्से पंचायत सभागृहात शुक्रवारी आयोजित ग्रामस्थांच्या समस्या जाणून घेण्याच्या कार्यक्रमात ते बोलत होते.

यावेळी सरपंच प्रगती सोपटे, उपसरपंच अजित मोरजकर, पंच परेश गवंडी, पंच पार्सेकर, रवी महालदार, लक्ष्मीकांत गवंडी आदी व्यासपीठावर उपस्थित होते.

आरोलकर यांनी सुरुवातीला पंचायत मंडळाच्या समस्या जाणून घेतल्या. विविध विकास कामांचे ठराव तसेच मंजूर होऊन सरकार दरबारी रखडलेली कामे यांचीही माहिती जाणून घेतली. पंच सदस्य सरपंच यांनीही आपापल्या प्रभागातील कामांची यादी आमदार जीत आरोलकर यांना सादर केली.

प्रत्येक पंचायतीत आठवड्यात अर्धा दिवस

पंचायत मंडळाचा कार्यकाळ संपुष्टात आला आहे. पंचायत क्षेत्रातील नागरिकांच्या समस्या किंवा त्यांचे लहान लहान कामे पंचायती मार्फत कशा पद्धतीने सोडवली जातील. या विषयी आपण आपल्या कर्मचाऱ्यांसहित दर आठवड्याला अर्धा दिवस प्रत्येक पंचायत क्षेत्रात लोकांच्या समस्या जाणून घेण्यासाठी उपलब्ध राहू,अशी ग्वाही आमदार जीत आरोलकर यांनी यावेळी दिली.