नागवा - हडफडे येथील वीज उपकेंद्राच्या आवारात नवीन मोबाईल टॉवर उभारण्याचा प्रयत्न स्थानिकांनी मंगळवारी हाणून पाडला. दरम्यान, स्थानिक पंचायत मंडळाकडून याआधीच मोबाईल टॉवरच्या बांधकामास विरोध करणारा ठराव मंजूर करून घेण्यात आल्याने कळंगुटचे आमदार मायकल लोबो तसेच हडफडेचे सरपंच रोशन रेडकर या प्रकरणावरून एकमेकांच्या आमनेसामने आले.

सध्याच्या शैक्षणिक पद्धतीनुसार विद्यार्थ्यांसाठी इंटरनेट नेटवर्क सुरळीत राहणे आवश्यक असून त्यासाठी गावोगावी मोबाईल टॉवर उभारणे काळाची गरज असल्याचे कळंगुटचे आमदार मायकल लोबो यांनी सांगितले, तर स्थानिकांनी मोबाईल टॉवरला विरोध केल्यामुळे सरपंच रोशन रेडकर यांनी विरोध केला. त्यामुळे आमदार आणि पंच यांच्यातील वाद पुढे आला आहे.

स्थानिकांनी पंचायत कार्यालयात मोठ्या प्रमाणावर उपस्थिती लावून मोबाईल टॉवरला जोरदार विरोध केला. त्यामुळे स्थिती हाताबाहेर जाऊ नये म्हणून पोलिसांनाही यावेळी हस्तक्षेप करावा लागला.

लोबो म्हणाले...

लोकांनी शैक्षणिक माध्यम आणि काळाची गरज ओळखून मोबाईल टॉवरला विरोधासाठी विरोध करण्याऐवजी याबाबतीत अधिक जाणून घ्यावे. यासाठी सरकारकडूनही जनजागृती मोहीम हाती घेणे आवश्यक आहे.

सरपंचांचे म्हणणे...

गावागावांतील प्रभाग क्षेत्रांचा विचार केल्यास सुरळीत कनेक्टिविटीसाठी परिसरातील इमारतींवर मोबाईल टॉवरऐवजी छोटे बुस्टर बसवूनसुद्धा विद्यार्थ्यांची सोय होऊ शकते, अशी बाजू यावेळी सरपंचांनी मांडली.