गोव्यात उघड्यावर कचरा टाकण्याचे प्रमाण असेच सुरू राहिल्यास पुढील दहा वर्षात एकही पर्यटक गोव्यात येणार नाही. असा सूचक इशारा गोव्याचे मुख्यमंत्री प्रमोद सावंत (CM Pramod Sawant) यांनी दिला आहे. पणजी येथे आज कचरा व्यवस्थापनावर स्टेकहोल्डर एंगेजमेंट कार्यशाळेचे उद्घाटन करण्यात आले, त्यावेळी मुख्यमंत्री बोलत होते. यावेळी भाभा ऍटोमिक रिसर्च सेंटरचे (BARC) शास्त्रज्ञ डॉ. शरद काळे आणि इतर मान्यवरांच्या उपस्थितीत होते.

"गोव्यातील साळगाव येथे आशिया खंडातील सर्वात मोठा कचरा व्यवस्थापन प्रकल्प आहे. राज्यात सर्व प्रकारचा कचरा व्यवस्थापन करण्याची व्यवस्था करण्यात आली आहे. ई-वेस्ट, बांधकाम संबधित कचरा आणि बायो-मेडिकल (वैद्यकीय कचरा) याचे देखील व्यवस्थापन केले जाते. कचरा व्यवस्थापनावरील वर्कशॉप पंचायत सदस्य, सरपंच आणि इतर सभासदांना विविध माहिती मिळण्यासाठी महत्वाचा ठरणार आहे. गोव्याला स्वच्छ ठेवण्याची आणि त्याची ओळख जपण्याची आपली जबाबदारी आहे. राज्यातील पर्यटन वाढीसाठी आणि जनजीवन सुरळीत करण्यासाठी हे महत्वाचे आहे." असे मुख्यमंत्री सावंत म्हणाले.

स्वत:च्या सोईसाठी गोव्यातील रस्त्यावर किंवा सार्वजनिक ठिकाणी कचरा टाकू नका. आणि उघड्यावर कचरा टाकून देणे सुरूच राहिल्यास त्याचा तोटा गावांना देखील होईल. आरोग्य देखील धोक्यात येऊ शकते. गोव्याला स्वच्छ ठेवण्याची आपल्या प्रत्येकाची जबाबदारी आहे. असे मुख्यमंत्री सावंत म्हणाले.