सासष्टी: सावर्डे मतदारसंघातील गांधीनगर परिसरात नागरिकांना सुरळीत पाणीपुरवठा होत नसल्याने या परिसरात पाणीटंचाई निर्माण झाली आहे. महिलांना पिण्याच्या पाण्यासाठी वणवण करावी लागत असून ओहोळवर जाऊन पाणी आणण्याची वेळ नागरिकांवर आली आहे. गांधीनगरवासीयांना भेडसावणारी ही समस्या दूर करून लवकरात लवकर सुरळीत पाणीपुरवठा करण्याची मागणी ग्रामस्थांनी केली आहे.

सरकारने 24 तास पाणीपुरवठा करण्यात येणार असल्याचे आश्वासन दिले आहे, पण सावर्डे मतदारसंघातील गांधीनगर गावात दिवसाला दोन तासही पाणी मिळत नाही. पाणीपुरवठा करणाऱ्या यंत्रणेत त्रुटी आल्याने पाणीपुरवठा होत नसल्याचे संबंधित खात्याकडून सांगण्यात येत असून यंत्रणेत बिघाड होणे हे रोजचेच झाले आहे. सांगेतील धरणाचे पाणी हे विविध भागात पोचते, पण या धरणाजवळ असलेल्या सावर्डे मतदारसंघाला गांधीनगरला मात्र पाण्याची समस्या भेडसावत आहे. सुरळीत पाणीपुरवठा आश्वासन देण्यात आलेले असले, तरी अद्याप या आश्वासनाची पूर्तता करण्यात आलेली नाही, असे स्थानिकांनी सांगितले.

सावर्डे मतदारसंघात जायकाच्या जलवाहिन्या घालण्यात आलेल्या आहेत, पण या जलवाहिन्यांतून अजून पाणी आलेले नाही. गांधीनगर परिसरात गेल्या अनेक वर्षांपासून पाण्याची समस्या भेडसावत असून सणासुदीला तर पाणीपुरवठा खंडित होणे हा नित्यकर्मच बनला आहे. सरकार आज गोमंतकीयांना मोफत पाणीपुरवठा करण्याचे आश्वासन देत आहे, पण गांधीनगरवासीयांना सुरळीत पाणी पुरवठाच मिळणे कठीण बनले आहे, असे स्थानिकांनी सांगितले.