पणजी: यंदा १५ ऑगस्ट या स्वातंत्र्यदिनानिमित्त कोणत्याही कैद्याची कोलवाळ तुरूंगातून मुक्तता केली जाणार नाही. तसा प्रस्तावच कारागृह महानिरीक्षकांकडून आजवर राज्याच्या गृह खात्याकडे सादर करण्यात आलेला नाही.

देशाच्या स्वातंत्र्यदिनानिमित्ताने कारागृहातील वयोवृद्ध किंवा आजारी कैद्याची मुक्तता मानवतेच्या दृष्टीकोनातून करण्याची प्रथा आहे. त्यासाठी अशा कैद्यांची निवड करून त्यांची नावे राज्य सरकारच्या मान्यतेसाठी गृह खात्याच्या माध्यमातून कारागृह प्रशासन पाठवते.

राज्य सरकारने ती नावे स्वीकारली की, राज्यपालांच्या मान्यतेनंतर त्या कैद्यांच्या मुक्ततेचा आदेश जारी करण्यात येतो आणि १५ ऑगस्ट रोजी त्या कैद्यांना मुक्त केले जाते.

कोलवाळ कारागृह सध्या अनेक कारणांमुळे गाजतेय,त्यामुळे या मुद्याला बगल दिली गेली नसावी, असे मानले जात आहे.