कर्नाटकात काँग्रेसचे सरकार सत्तेवर असले तरीही आम्‍ही गोव्‍यात म्‍हादई प्रश्‍नावर कुठलीही तडजोड करणार नाही. म्‍हादई हा आमचा जीवन मरणाचा प्रश्‍न आहे. त्‍यामुळे म्‍हादईचे पाणी कर्नाटकात वळविण्‍याला आमचा ठाम विरोध असेल, असे मत दक्षिण गोव्‍याचे खासदार कॅ. विरियातो फर्नांडिस यांनी व्‍यक्‍त केले.

आज कॅ. फर्नांिडस यांनी मडगावातील पत्रकारांशी संवाद साधला असता, त्‍यांनी ही माहिती दिली. गोव्‍यातील काँग्रेसने म्‍हादईबाबतीत कुठलीही तडजोड करण्‍याची गरज नाही, असे आम्‍हाला खुद्द पक्षश्रेष्‍ठींनी सांगितलेले आहे. त्‍यामुळे कर्नाटकाला फायदा हाेईल, अशी कुठलीही भूमिका गोव्‍यातील काँग्रेस घेणार नाही, असेही त्‍यांनी सांगितले.

कॅ. फर्नांडिस यांची भेट घेण्‍यासाठी आज ‘बीएसएनएल’ चे अधिकारी आले होते. त्‍यांच्‍याशी कॅ. फर्नांडिस यांनी चर्चा केली. गाेव्‍यात ग्रामीण भागात माेबाईल नेटवर्कची कनेक्‍टिव्‍हीटी वाढावी यासाठी ‘बीएसएनएल’ने प्रयत्‍न करावेत.इतर कंपन्‍यांच्‍या तुलनेत ‘बीएसएनएल’ची सेवा स्‍वस्‍त असल्‍याने लाेकांना त्‍याचा फायदा होऊ शकतो. त्‍यामुळे या संबंधी ‘बीएसएनएल’ने ग्रामीण भागात जाऊन जागृती करावी, अशी सूचनाही त्‍यांनी केली.