पणजी : पेडण्यातील दुमजली गेस्ट हाऊसचे बांधकाम पाडण्याचा आदेश गोवा किनारपट्टी क्षेत्र व्यवस्थापन प्राधिकरणाने (जीसीझेडएमए) दिला होता. त्यावर राष्ट्रीय हरित लवादाने शिक्कामोर्तब करत बांधकाम (Construction) मालकाने दाखल केलेली आव्हान याचिका फेटाळली.

या गेस्ट हाऊसचे बांधकाम सीआरझेड कायदा 1991 पूर्वीचे असल्याचा पुरावा मालक सिद्ध करू शकला नाही, असे निरीक्षण लवादाने हा निर्णय देताना आदेशात नोंदवले आहे. बांधकाममालक गणेश ऊर्फ सुजय पै यांनी जीसीझेडएमए आदेशाला आव्हान दिले होते.

जून 2019 मध्ये ‘जीसीझेडएमए’ने सुजय पै यांना गेस्ट हाऊसचे दुमजली बांधकाम व रेस्टॉरंट (Restaurant) पाडण्याचा व तेथील जमीन पूर्वस्थितीत करण्याचा आदेश दिला होता. त्यासाठी 30 दिवसांची मुदत दिली होती. ही दोन्ही बांधकामे हरमल येथील वेगवेगळ्या सर्वेमध्ये असली तरी ती 1991 पूर्वीची होती व त्यांचे नुतनीकरण 2009 मध्ये केले होते. त्यामुळे सीआरझेड 1991अधिसूचनेचे उल्लंघन झाल्याचा इन्कार मालकाने केला होता.

-...ते बांधकाम 1991 नंतरचे

या बांधकामांची नव्याने तपासणी केली असता ते 1991 नंतर करण्यात आले असून ते पूर्वीचे असल्याचा कोणताही पुरावा नाही. प्रादेशिक आराखड्यातही हे बांधकाम दाखवलेले नाही. जुने बांधकाम याचिकादाराचे नसून त्याच्याशी या प्रकरणाशी काहीच संबंध नाही, अशी बाजू ‘जीसीझेडएमए’चे वकील तसेच तक्रारदाराच्या वकिलांनी लवादासमोर मांडली होती.