म्हापसा: हणजूण समुद्रकिनाऱ्यावर पुन्हा एकदा तेलाचे गोळे (टार बॉल्स) वाहून आल्यामुळे समुद्रकिनाऱ्याला भेट देणाऱ्या पर्यटकांसह स्थानिक नागरिकांना मोठ्या त्रासाला सामोरे जावे लागत आहे. शनिवारपासून या समुद्रकिनाऱ्यावर तेलगोळेे येण्यास सुरुवात झाली असून, किनाऱ्यालगत काळा आणि चिकट पदार्थ पसरलेला दिसत आहे. यामुळे समुद्रकिनाऱ्यावर येणाऱ्या अनेक पर्यटकांची गैरसोय होत आहे. दरवर्षी साधारणपणे मे महिन्यात ‘टार बॉल्स’ किनाऱ्यावर येणे ही नियमित घटना असल्याचे स्थानिकांनी सांगितले.

हा डांबरासारखा पदार्थ समुद्रातून वाहून किनाऱ्यावर आल्याचे सांगत, समुद्रकिनाऱ्यावर फिरताना हा काळा चिकट पदार्थ पायाला चिकटल्याच्या तक्रारी अनेक पर्यटकांनी आणि रहिवाशांनी केल्या आहेत. सध्या अनेक स्थानिक नागरिक आपल्या कुटुंबासह समुद्रात वार्षिक स्नानासाठी येथे येत असतात. त्यामुळे या समस्येची दखल घेऊन स्थानिक पंचायत आणि पर्यटन विभागाने तातडीने समुद्रकिनाऱ्यावर स्वच्छता मोहीम राबवावी, अशी मागणी येथील रहिवाशांनी केली आहे. दरम्यान, स्थानिक पंचायत आणि पर्यटन विभागाने आवश्यक पावले उचलून किनाऱ्यावर वाहून आलेले टार बॉल्स तातडीने हटवावेत, अशी मागणीही करण्यात आली आहे.

आरोग्यासही धोका

हणजूण-कायसूव जैवविविधता समितीचे अध्यक्ष रमेश नाईक यांनी सांगितले की, दरवर्षी हणजूण-वागातोर किनारपट्टीवर हे टार बॉल्स वाहून येतात, ज्यामुळे पर्यटक आणि स्थानिकांना मनस्ताप सहन करावा लागतो.

मे महिन्यात अनेक लोक समुद्रात वार्षिक स्नानासाठी येतात आणि या तेल गोळ्यांच्या संपर्कात आल्यास त्याची आरोग्यासही धोका निर्माण होऊ शकतात, असे त्यांनी स्पष्ट केले.