New Zuari Bridge Second Lane: नवीन झुआरी पुलाच्या दुसऱ्या लेनचे प्रलंबित काम आता अंतिम टप्प्यात आहे. सार्वजनिक बांधकाम मंत्री नीलेश काब्राल यांनी दिलेल्या माहितीनुसार, मध्यंतरीच्या काळात गोव्यातील खराब वातावरणाचा पुलाच्या कामावर परिणाम झाला. त्यामुळे हे काम लांबले.

आता पुलाचे काम येत्या 10 डिसेंबरपर्यंत पूर्ण होण्याची शक्यता आहे. तसेच जानेवारीमध्ये पुलाच्या दुसऱ्या लेनचे मुख्यमंत्री प्रमोद सावंत यांच्या हस्ते उद्घाटन होण्याची शक्यता आहे. याबाबत अधिकृतरित्या मुख्यमंत्री लवकरच तारीख जाहीर करतील.

खरंतर दिवाळीपूर्वी हे काम पूर्ण होऊन दुसरी लेन वाहतुकीसाठी खुली करण्यात येणार होती. मात्र गोव्यातील खराब हवामानामुळे पुलाचे काम काही काळ थांबले, अशी माहिती दिलीप बिल्डकॉनचे स्ट्रक्चरचे उपाध्यक्ष अतुल जोशी यांनी दिली होती. पण आता लवकरच हे प्रलंबित काम पूर्ण करण्यासाठी सार्वजनिक बांधकाम विभागाने कामाचा वेग वाढवला आहे.

नवीन झुआरी पुलासाठी सुमारे 200 हून अधिक केबल्सचा वापर करण्यात आला आहे. या पुलाचे आयुर्मान हे 120 वर्षे असेल असे सांगण्यात येत आहे.

पुलाची देखरेख ही अगोदरची आठ वर्षे दिलीप बिल्डकॉन कंपनी करेल तर नंतर हा पूल गोवा सर्वजनिक बांधकाम खात्याकडे सोपविण्यात येणार आहे.