देवसडा धारबांदोडा येथे असलेल्या 12 लाख चौरस मीटर जागेत आयआयटी प्रकल्प उभारण्यासाठी 2017 साली तत्कालीन मुख्यमंत्री मनोहर पर्रीकर यांच्याकडे प्रस्ताव दिला होता. त्यानुसार त्यावेळी परिसरात सर्वेक्षण करण्यात आले होते. परंतु सरकारने प्रकल्प शेळ - मेळावली येथे नेण्याचा निर्णय घेतल्याने प्रस्तावावर विचार केला नव्हता.

आयआयटी प्रकल्प उभारल्यास धारबांदोडा तालुका शैक्षिणक हब म्हणून नावलौकिक मिळवू शकतो. परंतु प्रकल्प उभारण्यापूर्वी सरकारने स्थानिक लोकांना विश्वासात घेण्याची आवश्यकता असल्याचे मत माजी बांधकाम मंत्री दीपक पाऊसकर यांनी व्यक्त केले आहे.

दाबाळ येथे गाडवंस जल्मी ब्राह्मणी बालसती या मंदिरकडे जाणाऱ्या रस्त्यावर सुमारे दीड रुपये खर्च करून बांधलेल्या स्वागत द्वाराच्या उद्घाटन प्रसंगी माजी बांधकाम मंत्री दीपक पाऊसकर बोलत होते.

सदर स्वागत द्वार स्थानिक पंच रमाकांत गावकर व भोला गावकर यांनी स्वखर्चाने बांधण्यात आले आहे. यावेळी प्रतिभा तेंडुलकर, सावर्डेचे माजी सरपंच संदीप पाऊसकर, पंच रमाकांत गावकर, भोला गावकर, भालचंद्र नाईक, सिध्दी पाऊसकर व अन्य ग्रामस्थ उपस्थित होते.

धारबांदोडा येथील सरकारी जागेत आयआयटी उभारल्यास परिसराचा विकास अधिक प्रमाणात होणार आहे. परंतु प्रकल्प उभारण्यासाठी सरकारने स्थानिकांना विश्वासात घेण्याची अत्यंत गरज आहे. कारण स्थानिक लोकांच्या काजू बागायती मोठ्या प्रमाणात आहेत. त्यामुळे स्थानिकांचा विचार प्रथम करण्याची गरज आहे. पंच सदस्य रमाकांत गावकर व भोला गावकर यांनी समाजासाठी अनेक उपक्रम राबविले आहे. त्याचा लाभ स्थानिकांना मिळत असल्याचे दीपक पाऊसकर यांनी सांगितले.