Goa Government: किनारी भागातील लोकांना चक्रीवादळापासून सुरक्षा मिळावी म्‍हणून मांद्रे येथे 2021 साली पायाभरणी करण्‍यात आलेला व 2022 साली लाकार्पण करण्‍यात आलेला नॅशनल सायक्‍लॉन प्रकल्प एक वर्षाचा काळ उलटला तरी आजपर्यंत विनावापर पडून आहे.

तत्कालीन आमदार दयानंद सोपटे यांच्या प्रयत्नाने सदर प्रकल्प उभारण्‍यात आला होता. किनारी भागात एखाद्या वेळी वादळ, वारे, पाऊस किंवा एखादी त्‍सुनामी आली आणि तेथील ग्रामस्‍थांसह त्‍यांच्‍या घरांना धोका निर्माण झाला तर त्यांची सुरक्षेसाठी हा प्रकल्‍प उभारण्‍यात आला आहे.

गेल्‍या वर्षी मुख्यमंत्री डॉ. प्रमोद सावंत यांच्या हस्ते त्‍याचे अनावरण करण्‍यात आले होते. परंतु अजूनही हा प्रकल्‍प तसाच पडून आहे.

उद्‌घाटनावेळी मुख्‍यमंत्री म्‍हणाले होते की, पंचायत क्षेत्रातील एखादी छोटेखानी बर्थडे पार्टी, सांस्कृतिक कार्यक्रम, पुस्तक प्रकाशन असे विविध कार्यक्रम करण्यासाठी या जागेचा वापर करावा आणि त्यासाठी स्थानिक पंचायतीकडून परवानगी घ्यावी. तसेच या प्रकल्पाचा जास्तीत जास्त लोकांनी लाभ घ्यावा. मात्र आजपर्यंत या प्रकल्पात एकही कार्यक्रम झालेला नाही.

शिवाय येथे टाळे लावल्‍यामुळे इमारत विनावापर पडून आहे. त्या परिसरात लावलेल्या झाडांना योग्य प्रमाणात पाणी घातले जात नाही किंवा त्‍यांची देखरेख करण्यासाठी एकही माणूस नाही. त्यामुळे सरकारने अशा प्रकल्पावर खर्च केलेले कोट्यवधी रुपये पाण्यात जातात की काय, अशी भीती व्यक्त करण्‍यात येत आहे. या प्रकल्पाचा वापर करावा, अशी मागणी स्थानिकांनी केली आहे.