पणजी : गोवा पर्यटन विकास महामंडळातर्फे येत्या 17 जुलै रोजी नानेली धबधबा येथे पावसाळी पदभ्रमण मोहीमेचे आयोजन करण्यात आले आहे. नानेलीच्या जंगलात असलेला हा मोसमी धबधबा असून तेथे पोचण्यासाठी मोठ्या प्रमाणात श्रम घ्यावे लागत नाहीत. या धबधब्याचे उंचावरून दर्शन घेणे अत्यंत आल्हाददायक आहे.

या धबधब्यावर पोचण्यासाठी आपल्याला नानेली गावातून 3 किलोमीटर चालावे लागते. हे पदभ्रमण सोपे आहे. यासाठी दोन्ही बाजूंकडून मिळून एकूण 6 किमी चालावे लागते. तर बसने पणजी ते वाळपई हे अंतर 52 किमी आहे. साहसाची आवड असलेल्या सर्व निसर्गप्रेमींसाठी हे पदभ्रमण खुले आहे. यासाठी मडगाव व म्हापसा येथून बसची व्यवस्था सकाळी ७ वा. करण्यात आली आहे.

पणजी येथील पर्यटन भवनजवळून सकाळी 9 वा. बसची व्यवस्था आहे. तसेच ओल्ड गोवा, बाणस्तारी व साखळी आरोग्य केंद्र येथे थांबा घेण्यात येईल. नोंदणी शुल्क भोजनासह रू. 1000/- असे आहे. इच्छुकांनी सोबत कपड्यांची अतिरिक्त जोडी, रेनकोट, ट्रेकिंग शूज, पाण्याची बाटली, स्नॅक्स आणि दुर्बिण असे साहित्य घ्यावे असे कळविण्यात आले आहे. धूम्रपान व मद्यपानाला मनाई असेल.