कळंगुट: भारतीय जनता पक्षातील वरिष्ठांशी असलेले मतभेद तसेच वैयक्तिक नाराजी विशेष बैठकीनंतर पुर्णपणे दुर झाली आहे. त्यामुळे पक्षासोबतच आपण आगामी विधानसभेची निवडणूक लढविणार असल्याचा निर्धार कळंगुटचे आमदार तसेच मंत्री मायकल लोबो (Michael Lobo) यांनी व्यक्त केला आहे. कांदोळी येथील एका कार्यक्रमानंतर त्यांनी 'गोमन्तक'सोबत संवाद साधताना ही माहिती दिली.

आपण कुणाच्याही दबावाखाली आलेलो नसून गेली पंधरा वर्षे पक्षांशी असलेली निष्ठा आणि स्व.मनोहर पर्रीकरांचा (Manohar Parrikar) वारसा पुढे नेण्याच्या ध्येयापोटीच भाजपची (BJP) कास धरण्याचा निर्धार केल्याचे मंत्री लोबो यांनी शेवटी सांगितले. दरम्यान, लोबोंच्या या वक्तव्यानंतर गेले कित्येक दिवस लोबो पक्षाला सोडचिठ्ठी देतील म्हणून उठलेल्या अफवांना आता चाफ बसल्यातच जमा झाला आहे.

प्रत्येक पक्षात रुसवे-फुगवे असतातच तसे ते भाजपातही आहेत. पक्षातील नाराजी संबंधात इतरांपेक्षा मीच अधिक पोटतिडकीने बोललो. त्यामुळे मला टार्गेट करण्यात आले.परंतु सोमवारी पक्षाच्या वरिष्ठांशी झालेल्या विशेष बोलणीनंतर या सर्व गोष्टींना तिलांजली मिळाली. दरम्यान, बार्देशातील शिवोली मतदारसंघात दिलायला लोबोंंना भाजपने तिकीट नाकारल्यास त्या निश्चितच अपक्ष म्हणून स्वतंत्रपणे निवडणूक लढवणार आहेत. हा निर्णय त्यांचा स्वत:चा असल्याचे मंत्री लोबो यांनी सांगितले.