चार वर्षांपूर्वी स्वतःच्याच अल्पवयीन मुलीवर बलात्कार केल्याचा आरोप असलेल्या 41 वर्षीय नराधम बापाने कर्नाटकातून येऊन मडगावात आज आपल्या घरी प्रवेश करताच त्याच्या मुसक्या मडगाव पोलिसांनी आवळल्या.

मिळालेल्या माहितीनुसार, संशयित हमालीचे काम करत होता. तो मडगावातील घर सोडून आपल्या मूळ गावी कर्नाटकात गेला होता. आता तो चार वर्षांनी परत आपल्या घरी येऊ पाहात होता.

पण बाप घरी आल्यास आपल्याला पुन्हा त्याच्या वासनेची शिकार व्हावे लागणार, याची भीती असल्याने मुलीने त्याला घरात घेण्यास कडाडून विरोध केला आणि चार वर्षांपूर्वीचा हा प्रकार उघडकीस आला.

...आणि बापाचे कुभांड उघडे

काही दिवसांपूर्वी त्याने पत्नीशी संपर्क साधून आपण घरी परत येतो, असे सांगितले होते. ही गोष्ट तिने आपल्या मुलीच्या कानावर घातल्यावर तिने बापाला घरात घेण्यास कडाडून विरोध केला.

याचे कारण आईने खोदून विचारल्यावर तिने चार वर्षांपूर्वी आपल्याबाबत घडलेला प्रसंग कथन केला. याची तक्रार नोंदवल्यावर पोलिसांनी त्या नराधमाला अटक केली.

संशयिताने कर्नाटकातही एका अल्पवयीन मुलीवर बळजबरी केल्याचा प्रकार उघडकीस आला असून पोलिस त्याही घटनेचा तपास करत आहेत.