पणजी: कोकेन ड्रग्जप्रकरणी अटक केलेल्या ड्रग्ज माफिया यानिव बेनाहिन ऊर्फ अटाला याने जामिनासाठी केलेल्या अर्जावरील सुनावणीवेळी सरकारी वकिलांनी बुधवारी (28 मे) उत्तर देण्यासाठी वेळ घेतल्याने त्यावरील सुनावणी मुंबई उच्च न्यायालयाच्या गोवा खंडपीठाने १० जूनला ठेवली आहे. बेकादेशीर वास्तव्य केल्याप्रकरणी त्याच्याविरुद्ध हणजूण पोलिस स्थानकातही गुन्हा नोंद आहे.

पोलिस खात्याच्या अमलीपदार्थविरोधी कक्षाच्या पथकाने संशयित यानिव ऊर्फ अटाला याला तो भाडेपट्टीवर राहत असलेल्या फ्लॅटवर छापा टाकून अटक केली होती. त्याच्या फ्लॅटची झडती घेतली असता कमर्शियल प्रमाणात कोकेन ड्रग्ज सापडला होता.

या छाप्यावेळी त्याच्याकडे गोव्यातील (Goa) बँक खात्याचे पासबुक तसेच आधार कार्ड सापडले होते. या आधार कार्डच्या साहाय्याने त्याने आंतरराज्य विमान प्रवास केला होता. त्यामुळे त्याच्या या आधार कार्डचा तपास पोलिस करत आहेत. त्याने जामिनासाठी सत्र न्यायालयात केलेला अर्ज फेटाळल्याने उच्च न्यायालयात अर्ज सादर केला आहे. सध्या तो न्यायालयीन कोठडीत आहे.