चावडी: काणकोण तालुक्यातील मुडकूड परिसरात गेल्या २० दिवसांपासून मोबाईल नेटवर्क सेवा ठप्प झाल्याने नागरिकांची मोठी गैरसोय होत आहे. मोबाईल संपर्क तुटल्यामुळे परदेशात नोकरीनिमित्त असलेल्या नातेवाइकांशी संवाद साधणेही कठीण झाले आहे.

नेटवर्कअभावी सरकारी योजनांचा लाभ घेण्यासह दैनंदिन व्यवहारांवरही परिणाम झाला आहे. व्यावसायिक, नोकरदार, विद्यार्थी आणि ज्येष्ठ नागरिकांना याचा फटका बसत आहे.

या समस्येकडे प्रशासनाचे लक्ष वेधण्यासाठी आगोंदचे माजी सरपंच प्रमोद फळदेसाई आणि स्थानिक नागरिकांनी उपजिल्हाधिकारी भगवत करमली यांची भेट घेऊन निवेदन सादर केले. करमली यांनी मोबाईल नेटवर्क सेवा लवकर पूर्ववत करण्याचे आश्वासन दिले.

दरम्यान, उपजिल्हाधिकाऱ्यांच्या हस्तक्षेपानंतर जिओ कंपनीने नेटवर्क यंत्रणेच्या दुरुस्तीचे काम सुरू केले आहे. त्यामुळे लवकरच सेवा पूर्ववत होईल, अशी अपेक्षा नागरिकांनी व्यक्त केली आहे.