पणजी: गोव्यातील एका वैद्यकीय महाविद्यालयाच्या माजी विद्यार्थ्यांच्या स्नेहसंमेलनासाठी मानधन घेऊनही उपस्थित न राहिल्याप्रकरणी अभिनेत्री मौसमी चटर्जी यांना नाशिक जिल्हा ग्राहक तक्रार निवारण आयोगाने ३ लाख रुपये परत करण्याचे आदेश दिले आहेत.

तसेच मानसिक त्रासासाठी १ लाख रुपये नुकसान भरपाई आणि २५ हजार रुपये खटल्याचा खर्च देण्याचे निर्देश दिले. एका निवृत्त वैद्यकीय अधिकाऱ्याने आयोजित केलेल्या या कार्यक्रमासाठी चटर्जी यांनी ३ लाख रुपये मानधनावर उपस्थित राहण्याचे मान्य केले होते.

आयोजकांनी २ लाख रुपये आगाऊ देऊन विमानप्रवास, हॉटेल निवासाची व्यवस्था केली होती. मात्र, गोव्यात येऊनही त्या कार्यक्रमाला उपस्थित राहिल्या नाहीत. ही घटना १७ नोव्हेंबर २०२३ रोजी घडली होती. दुसऱ्या दिवशीच त्‍या निघून गेल्या.

आयोगाचे निरीक्षण असे होते की, जर कथित अटींच्या उल्लंघनामुळे अभिनेत्री मौसमी चटर्जी यांना कार्यक्रम सादर करण्याची इच्छा नव्हती, तर त्यांनी कार्यक्रमापूर्वीच प्रवासाला जाण्यास नकार द्यायला हवा होता, जेणेकरून तक्रारदाराला पर्यायी व्यवस्था करता आली असती.

अभिनेत्रीचा दावा फेटाळला

कार्यक्रमापूर्वी अटींची पूर्तता न झाल्याचा अभिनेत्रीच्या बाजूने दावा करण्यात आला. मात्र, अशा अडचणी असल्यास प्रवासापूर्वीच नकार देणे अपेक्षित होते, असे आयोगाने नमूद केले. कार्यक्रमाला अनुपस्थित राहणे ही ‘सेवेतील त्रुटी’ असल्याचे सांगत आयोगाने तक्रारदाराच्या बाजूने निर्णय दिला.