Goa Ministers Mahakumbh Visit Postponed

पणजी: मौनी अमावस्येनिमित्त प्रयागराजच्या महाकुंभात होणारी गर्दी लक्षात घेता गोव्‍यातील मंत्री, आमदारांचा दौरा आजचा नियोजित दौरा पुढे ढकलण्यात आला. काल रात्री उशिरा प्रयागराज येथील प्रशासनाकडूनच दौरा पुढे ढकलण्याची विनंती करण्यात आल्याने हा निर्णय घेण्यात आला.

मुख्यमंत्री, मंत्री, आमदार यांच्यासह १०० जणांचा समावेश असलेला प्रयागराजचा हवाई दौरा होणार असल्याचे वृत्त आज ‘गोमन्तक’ने दिल्यानंतर त्यासंदर्भात मोठी चर्चा राज्यभरात झाली. अनेकांनी मंत्री, आमदार प्रयागराजला गेले का, याबाबत विचारणा केली.

मिळालेल्या माहितीनुसार, प्रयागराज येथे होणारी गर्दी लक्षात घेता तेथे राजशिष्टाचार आणि सुरक्षिततेचा प्रश्‍‍न निर्माण होणार असल्‍याने मौनी अमावस्येच्या दिवशी प्रयागराज येथे येणे टाळावे, असे उत्तर प्रदेश प्रशासनाकडून कळविण्‍यात आले. आता फेब्रुवारीच्या पहिल्या आठवड्यात हा दौरा होणार आहे.

भाविकांसाठी दोन रेल्‍वेगाड्या धावणार!

१. गोवा ते प्रयागराज मार्गावर दोन खास रेल्वेगाड्या सोडण्याचे नियोजन करण्यात आले आहे.

२. गोव्‍यातून रेल्वे प्रयागराजला निघाल्यानंतर तेथे भाविकांचे स्वागत तेथील मंत्री, आमदार यांच्‍या उपस्थितीत होईल.

३. मडगावहून सुटणाऱ्या या रेल्वेगाड्या कधी सुटतील, त्यासाठी किती पैसे आकारले जातील, याची माहिती दोन दिवसांत देणार.

४. केवळ प्रवासाचे तिकीट सवलतीच्या दरात देऊन इतर सर्व खर्च राज्य सरकारने करावा असाही विचार प्रशासनात सुरू आहे.

५. प्रत्येक मतदारसंघातून किती जण येऊ शकतील याचा प्राथमिक अंदाज आमदारांकडून घेतला जात असल्याची माहिती मिळाली आहे.