वास्को: मुरगाव बंदर प्राधिकरणाने (एमपीए) उभारलेल्या फाटकाचा प्रश्न ऐरणीवर आला आहे. यासंदर्भात मुरगावचे आमदार संकल्प आमोणकर यांनी एमपीएचे अध्यक्ष डॉ. एन. विनोदकुमार यांची बुधवारी (0५ फेब्रुवारी) दुपारी भेट घेतली. त्यावेळी डॉ. विनोदकुमार यांनी सदर फाटक बंद करण्यात येणार नसल्याचे स्पष्ट करून ते २४ तास वाहतुकीसाठी उघडे असेल, असे आश्वासन दिले.

उड्डाणपुलाचे लोकार्पण २१ जानेवारीला झाल्यानंतर दुसऱ्या दिवशी (ता. २२) मुरगाव बंदर प्राधिकरणाने ते फाटक उभारले होते. त्यामुळे स्थानिकांनी संताप व्यक्त केला होता. फाटक उभारण्यामागे बंदर प्राधिकरणाचा हेतू काय, यासंबंधी उलटसुलट प्रतिक्रिया व्यक्त होत आहेत.

याप्रकरणी वास्कोचे आमदार कृष्णा साळकर, नगराध्यक्ष गिरीश बोरकर तसेच काही नगरसेवकांनी संताप व्यक्त करताना प्राधिकरणाची दादागिरी सहन केली जाणार नसल्याचे स्पष्ट केले होते. ते फाटक तेथून हटविलेच पाहिजे असा पवित्रा आमदार साळकर व इतरांनी घेतला आहे.

मुख्यमंत्री डॉ. प्रमोद सावंत, प्रदेशाध्यक्ष नाईक यांना निवेदन दिल्यावर आज बुधवारी दुपारी मुरगावचे आमदार आमोणकर यांनी मुरगाव मंडळ अध्यक्ष अविनाश नाईक, मुरगावचे भाजप प्रभारी संतोष केरकर, जयंत जाधव यांच्यासह प्राधिकरणाचे अध्यक्ष डॉ. विनोदकुमार यांची भेट घेऊन फाटकाचा प्रश्न उपस्थित केला. सदर फाटक स्थानिकांसाठी २४ तास उघडे असेल असे आश्वासन डॉ. विनोद कुमार यांनी दिले. त्यामुळे समाधान व्यक्त करण्यात येत आहे.

१) मुरगावचे आमदार संकल्प आमोणकर, वास्कोचे आमदार कृष्णा साळकर यांच्यासह बायणातील रहिवाशांच्या एका शिष्टमंडळाने मुख्यमंत्री डॉ. प्रमोद सावत, भाजप प्रदेशाध्यक्ष दामू नाईक यांची काल मंगळवारी भेट घेऊन निवेदन दिले होते.

२) या शिष्टमंडळात जयंत जाधव, कृष्णकांत (बाबू) कामत, डॉ. निखिल परुळेकर, श्याम नायक, सुकोर फर्नाडिस, मानू फर्नांडिस यांचा समावेश होता.

३) सदर निवेदनात फाटक उभारण्यामागे प्राधिकरणाच्या हेतूसंबंधी माहिती देण्यात आली. ते फाटक २४ तास उघडे ठेवण्यात येणार असल्यासंबंधी मुरगाव बंदर प्राधिकरणाकडून लेखी आश्वासन मिळाले पाहिजे. तसेच याप्रकरणी प्राधिकरणाच्या अध्यक्षांनी जाहीररीत्या वक्तव्य करावे अशी मागणी निवेदनात करण्यात आली होती.

४) त्यानुसार मुख्यमंत्र्यांनी जिल्हाधिकारी कार्यालयाला लक्ष घालण्याचे निर्देश दिले होते. जिल्हाधिकारी कार्यालयाने यासंबंधी प्राधिकरणाकडून स्पष्टीकरण मागावे अशी विनंती शिष्टमंडळाने केली.