वास्को: मुरगाव पालिका मंडळाच्या घनकचरा व्यवस्थापन समितीच्या बैठकीत दारोदार कचरा गोळा करणे, सीसीटीव्ही कॅमेरा लावणे, ‘ब्लॅक स्पॉट’च्या जागेचे सौंदर्यीकरण करणे वगैरे विषयांवर चर्चा करण्यात आली. त्याचप्रमाणे मुरगाव पालिकेच्या कायमस्वरूपी व कंत्राटी अशा सर्व सफाई कामगारांना ओळखपत्रे देण्याचा निर्णय घेण्यात आला.

या समितीचे अध्यक्ष व नगरसेवक नारायण बोरकर यांच्यासह नगराध्यक्ष गिरीश बोरकर, मुख्याधिकारी सिद्धिविनायक नाईक, नगरसेवक दामू नाईक, यतीन कामुर्लेकर, शमी साळकर, दामोदर कासकर, मुरगाव पालिका निरीक्षक, अभियंते उपस्थित होते.

मुरगाव पालिका क्षेत्रातील कचऱ्याचे योग्य व्यवस्थापन होण्यासाठी तसेच नागरिकांमध्ये जागरूकता करण्यासाठी कोणत्या उपाययोजना केल्या पाहिजेत, यासबंधी चर्चा करण्यात आली. दारोदार कचरा गोळा करणाऱ्या कामगारांकडे काहीजण कचरा देत नाहीत.

त्यानंतर तो कचरा इतरत्र फेकतात. जेणेकरून काही ठिकाणी ‘ब्लॅक स्पॉट’ तयार झाले आहेत. यासंबंधी चिंता व्यक्त करण्यात आली. हे ब्लॅक स्पॉट हटविण्यासाठी त्या जागांचे सौंदर्यीकरण करण्याचा निर्णय घेण्यात आला आहे. तेथे पुन्हा कचरा टाकू नये यासाठी त्या ठिकाणी सीसीटीव्ही कॅमेरा लावण्याचा निर्णय घेण्यात आला आहे.

त्यासाठी उच्च गुणवत्ता असलेल्या एकंदर पाच कॅमेऱ्यांचा वापर करण्यात येईल. प्रत्येक प्रभागात प्रत्येक सप्ताहात एका कॅमेराचा वापर केला जाईल. कॅमेऱ्यासाठी रोटेशन पध्दतीचा वापर करण्यात येणार आहे. यापूर्वी असा प्रयोग करण्यात आला होता. कचरा टाकणाऱ्याविरोधात दंडात्मक कारवाई करण्यात येईल. जेणेकरून संबंधितांना वचक बसण्याची शक्यता व्यक्त करण्यात आली.

...तर करणार कायदेशीर कारवाई

दारोदार कचरा गोळा करण्यासाठी येणाऱ्या कामगारांकडे कचरा न देता रस्त्यावर व इतर ठिकाणी काहीजण कचरा टाकतात, त्यासंबंधी योग्य कारवाई करण्यात येईल. सॅनिटेशन शुल्क देण्यास टाळाटाळ करणाऱ्यांची नावे त्या कामगारांकडून गोळा करण्यात येतील. त्यानंतर प्रत्येक प्रभागातील प्रत्येकी दहाजणांना कायदेशीर कारवाईसंबंधी नोटिसा पाठविण्यात येतील.

त्यानंतरही त्यांच्याकडून कोणताही प्रतिसाद न मिळाल्यास त्यासंबंधी सुनावणी होईल व संबंधित व्यक्तींविरोधात कायदेशीर कारवाई केली जाईल. वेळप्रसंगी त्यांची पाणी, वीज जोडणी तोडण्याची तरतूद आहे. त्याचा वापरही केला जाण्याची शक्यता आहे. कचरा व्यवस्थापनासंबंधी कोणती पावले उचलली पाहिजेत यासंबंधीही पाहणी करण्यात येईल.

नागरिकांसोबत हुज्जत

सफाई कामगारांना ओळखपत्रे देण्याचा निर्णय बैठकीत घेण्यात आला. कंत्राटी कामगारांकडे ओळखपत्रे नसल्याने तसेच गणवेश नसल्याने त्यांना ओळखणे कठीण होते. काहीवेळा नागरिक त्यांच्याकडे हुज्जत घालतात, तेव्हा नागरिकांना ते मुरगाव पालिकेचे कंत्राटी कामगार असल्याचे लक्षात येत नाही. त्याचा गैरफायदा कदाचित ते कंत्राटी कामगार घेण्याची शक्यता नाकारता येत नाही. त्यासाठी त्यांना ओळखपत्र देणयाचा निर्णय घेण्यात आला आहे.