मोरजी, विठ्ठलदास वाडा किनारी भागात आलेक्स फर्नांडिस यांच्या मालकीच्या दोन होड्यांना गुरुवारी (ता.२५) आग लागून सुमारे अकरा लाखांचे नुकसान झाले.

त्यावर स्थानिक मच्छीमार व्यावसायिकांनी मोरजी किनारी भागातील जमिनींना सोन्यापेक्षाही भाव मिळत असल्यामुळे या जमिनींवर ‘माफियां’चा डोळा आहे, असा दावा करत हे कृत्यही या माफियांनीच केले असण्याची शक्यता व्यक्त केली.

किनारी भागातील जमिनी या बिगर गोमंतकीयांनी विकत घेतलेल्या असून अशा जमीन माफियांना सरकारचा पाठिंबाही मिळत आहे.

आजपर्यंत मच्छीमार बांधवांच्या ज्या ठिकाणी पारंपरिक पद्धतीने होड्या, झोपड्या आहेत, तिथे जाणाऱ्या पायवाटाही बंद करण्याचा प्रकार जमीन माफियांकडून होत असून सरकारचे त्याकडे दुर्लक्ष झाले आहे. त्यामुळे आम्हाला न्याय मिळावा, अशी मागणी स्थानिक पंचसदस्य विलास मोरजे, संजय कोले यांनी केली आहे.

मागच्या नऊ वर्षांपूर्वी विठ्ठलदास वाडा किनारी भागात भूमाफियांकडून सुरक्षित ठेवलेल्या पारंपरिक नऊ होड्यांना आगी लावण्याचा प्रकार घडला होता. त्यावेळी पोलिसांमध्ये तक्रार नोंदवली; परंतु आजपर्यंत ज्यांचे नुकसान झाले, त्यांना कसल्याच प्रकारचा मोबदला मिळाला नाही.

आता पुन्हा एकदा अशी घटना घडली असून भूमाफियांनीच या दोन होड्यांना आग लावल्याचा संशय आहे. या होड्यांसोबतच त्या ठिकाणी सुरक्षित ठेवले जाणारे मच्छीमारीचे साहित्य आणि जाळ्यांनाही आग लागून आलेक्स फर्नांडिस यांचे सुमारे ११ लाखांचे नुकसान झाले आहे.

मच्छीमारांवर अन्याय : मच्छीमार बांधव असुरक्षित असल्याचा प्रकार वारंवार घडत आहे. मागच्या नऊ वर्षांपूर्वी ज्या पद्धतीने होड्यांना आग लावली त्याचीच पुनरावृत्ती यंदाही घडली आहे.

दोन घोड्यांना आगी लावून नुकसान केले. त्यानंतर गेल्या वर्षी याच ठिकाणी पारंपरिक मच्छीमारांनी उभारलेली एक झोपडी पर्यटन खात्याने त्यांना कसल्याच प्रकारची कारणे दाखवा नोटीस न पाठवता जमीनदोस्त केली होती.

हॉटेलसमोरील अडथळे हटवतात

१ एका बाजूने सीआरझेडचे उल्लंघन करून किनाऱ्यावर मोठ्या प्रमाणात बिगर गोमंतकीयांनी व्यवसाय थाटलेले आहेत. मोठ-मोठी हॉटेल्स, रिसॉर्ट बांधलेली आहेत आणि या हॉटेलच्या समोर ज्या मोकळ्या जमिनी कॅप्टन ऑफ पोर्ट किंवा सरकारच्या हद्दीत येतात त्या जमिनींवर या किनाऱ्यावर भूमाफियांचे लक्ष केंद्रित झाले आहे.

२ आपल्या हॉटेलसमोर बसल्यानंतर पर्यटकांना परिसर स्वच्छ दिसावा, कसल्याच प्रकारचे अडथळे निर्माण होऊ नयेत म्हणून भूमाफिया प्रयत्नशील आहेत आणि त्याच अनुषंगाने ज्या पारंपरिक मच्छीमारांच्या होड्या, झोपड्या आहेत त्या ठिकाणी जाणाऱ्या पारंपरिक पायवाटाही अडवण्याचा प्रकार घडत आहे.