Monsoon Arrives in Kerala 2023: अल निनोचा प्रभाव, अरबी समुद्रात निर्माण झालेले बिपरजॉय चक्रीवादळ आणि मॉन्सूनसाठी पोषक असलेल्या स्थितीचा अभाव, यांमुळे हुलकावणी देणारा मॉन्सून अखेर केरळच्या टप्प्यात आला आहे. पुढील 24 तासांत मॉन्सूनच्या सरी केरळात बरसतील.

हवामान खात्याच्या निवेदनानुसार, पूर्व-मध्य व आग्नेय अरबी समुद्रातील हे चक्रीवादळ पाच कि.मी. प्रतितास वेगाने उत्तर दिशेकडे सरकत आहे.

त्याचे तीव्र चक्रीवादळात रूपांतर झाले असून ते गोव्याच्या नैॡत्येला ८६० कि.मी., मुंबईच्या नैॡत्येला ९७० तर गुजरातेतील पोरबंदरच्या नैॡत्येला १,०५० कि.मी.वर होते.

येत्या 24 तासांत हे चक्रीवादळ उत्तरेकडे व त्यानंतरचे तीन दिवस उत्तर-वायव्य दिशेने सरकण्याची शक्यता आहे.

...तरच होईल मॉन्सून सक्रिय

1. दक्षिण अरबी समुद्रावर पश्चिमेकडील वाऱ्यांचा वेग कायम हवा.

2. मध्य ट्रोपोस्फेरिक पातळीपर्यंत पश्चिमेकडील वाऱ्यांची खोली वाढायला हवी.

3. आग्नेय अरबी समुद्र, लक्षद्वीप आणि केरळच्या किनारपट्टीवर ढगाळपणा वाढायला हवा.