पणजी: आजपासून तीन दिवसांत राज्यातील काही भागांमध्ये वादळी वारे आणि विजांच्या कडकडाटासह पाऊस पडण्याची शक्यता हवामान खात्याने वर्तविली आहे. हवामान विभागाने गुरुवारी पावसाची शक्यता वर्तविली होती.

त्यानुसार काणकोण, सांगे, केपे, सत्तरी, डिचोली तालुक्यांतील काही भागांत गडगडाटासह सरी कोसळल्या. त्यामुळे उष्मा कमी होऊन गारवा जाणवू लागल्याने नागरिकांना दिलासा मिळाला.

हवामान खात्याने आगामी तीन दिवस (ता. १६ ते १८ मे) पाऊस पडण्याचा इशारा देतानाच नागरिकांनी सतर्कता बाळगावी, असे आवाहन केले आहे.

गेल्या दोन-तीन दिवसांपासून रात्री ढग दाटून येत असून, मध्यरात्री किंवा पहाटे पाऊस पडत आहे. पुढील तीन दिवस राज्यात आकाश ढगाळ राहणार असून, काही ठिकाणी जोरदार पाऊस पडण्याची शक्यता आहे. वादळी वाऱ्याची शक्यता असल्याने मच्छीमारांनी खोल समुद्रात जाऊ नये, असे हवामान खात्याने सूचित केले आहे.