Mahadayi Water Dispute: कर्नाटकमधील निवडणुका डोळ्यांसमोर ठेवुनच म्हादई संदर्भात निर्णय घेण्यात आला असुन भारतीय जनता पक्ष तसेच काँग्रेस या दोन्ही राजकीय पक्षांना त्यापासून फायदा घ्यायचा आहे. त्यामुळे गोमंतकीयांनी म्हादई प्रश्र्न सोडविण्यासाठी या दोन्ही पक्षांच्या राजकारण्यांवर विश्र्वास ठेवु नये. ते या प्रश्र्नाला न्याय देऊ शकणार नाहीत. केवळ जनआंदोलनच म्हादई वाचवू शकेल, असे प्रतिपादन फातोर्डेचे आमदार तथा गोवा फॉरवर्ड पक्षाचे अध्यक्ष विजय सरदेसाई यांनी केले.

आमदार सरदेसाई म्हणाले, या पुर्वी कोकणी भाषेला मान्यता, गोव्याचे अस्तित्व राखण्यासाठीचा ओपिनियन पोल केवळ जनआंदोलनामुळेच यशस्वी झाला व त्यातुन गोवा बचावला. त्याचप्रमाणे यावेळीही जनआंदोलनाची गरज आहे. साखळी येथे म्हादई जनजागृतीसाठी जो लढा पुकारलेला आहेत त्यात सहभागी होणार आहे. म्हादई गेली तर सर्वप्रथम साखळीलाच त्याचा जास्त त्रास सोसावा लागेल. स्थानिकांना केवळ नोकऱ्या देऊन व आर्थिक मदत देऊन भागणार नाही. जगायला पाण्याचीही अत्यंत आवश्यकता आहे हे मुख्यमंत्र्यांनी लक्षात घ्यावे.

आमदार सरदेसाई म्हणाले, मुख्यमंत्री ऊठसुठ केवळ विरोधी पक्षांना जबाबदार धरतात. या प्रश्र्नी विरोधी पक्ष काहीच करु शकणार नाही. जे करायचे आहे ते सरकारी पक्षाला करायचे आहे असेही सरदेसाई यांनी स्पष्ट केले. मुख्यमंत्र्यांना दिल्लीत महत्व नाही. त्यांना दिल्लीत कुणी गांभीर्याने घेत नाही. म्हणुच सर्वोच्च न्यायालयात म्हादईप्रश्र्नी सुनावणी झाली नाही. पंतप्रधान किंवा इतर केंद्रीय मंत्री मुख्यमंत्र्यांचे ऐकत नाहीत, म्हणुनच तर म्हादई गमावण्याची वेळ आली.

ते म्हणाले, भाजप सरकार सर्व नगरपालिकांना, पंचायतींना ठराव मंजुर करुन पाठविण्यास सांगत आहे. जर निवडणुकीपुर्वी डीपीआर रद्द झाला नाही तर निवडणुकीत पंचायत व नगरपालिकांना भाजप विरोधात मते घाला असे सांगणार आहात का, असा प्रश्र्नही सरदेसाई यांनी केला. उद्या सकाळी 11 वाजता विधानसभा कामकाज सल्लागार समितीची बैठक होणार असुन या बैठकीत विधानसभा अधिवेशन 18 दिवसांचे करण्याची मागणी करणार आहे. चार दिवसांमध्ये कुठलेही कामकाज पुर्ण करता येणार नाही. शिवाय म्हादईचा प्रश्र्न गंभीर आहे. म्हादई संदर्भातील ठराव विधानसभेत मांडुन मंजुर करुन घ्यायला पाहिजे, असेही सरदेसाई यानी सांगितले.