आमदार प्रवीण आर्लेकर यांनी बुधवारी पेडणे सरकारी संकुलातील विविध सरकारी कार्यालयात अचानक भेट देऊन पाहणी केली. आर्लेकर यांनी प्रथम उपजिल्हाधिकारी कार्यालय गाठले. त्यानंतर उपजिल्हाधिकारी दीपक वायंगणकर यांच्यासह ते येथील विविध कार्यालयांत फिरले.

मामलेदार, गटविकास, सार्वजनिक बांधकाम खाते इमारती विभाग आदी कार्यालयात त्यांनी पाहणी केली. यावेळी काही कार्यालयात कर्मचारीवर्ग दिसला नाही. काही कार्यालये नव्या जागेत स्थलांतरित का केली नाहीत याची आमदारांनी विचारणा केली.

त्यावर उपजिल्हाधिकारी वायंगणकर यांनी पुढच्या आठवड्यात ही कार्यालये स्थलांतरित होतील, असे सांगितले. आमदार सरकारी संकुलात आल्याची माहिती मिळाल्यावर कर्मचाऱ्यांत धावपळ उडाली.

दरम्यान, स्वातंत्र्यदिन सोहळ्यात लोकप्रतिनिधी या नात्याने आपणाला भाषण करण्यास न मिळाल्याने तसेच झेंड्याची दोरी वेळी न सुटल्याने आर्लेकर यांनी उपजिल्हाधिकारी वायंगणकर यांच्याकडे विचारणा केली.

तसेच यापुढे तालुक्यात कोणताही सरकारी कार्यक्रम झाल्यास स्थानिक आमदार या नात्याने आपल्याशी चर्चा करूनच निर्णय घ्यावा, असे सुचवले.