Margao Municipality: हल्लीच मडगावात जुन्या बाजारात झालेल्या फेस्त फेरीतील विक्रेत्यांकडून सोपो कर म्हणून गोळा केलेल्या रकमेपैकी १७.६६ लाख रुपयांचा गैरवापर झाल्याचे उघडकीस आले आहे. या गैरवापर झालेल्या रकमेची चौकशी करावी व दोषींवर कडक कारवाई करण्याची मागणी कॉंग्रेस नेते आणि शॅडो कौन्सिलचे निमंत्रक सावियो कुतिन्हो यांनी केली आहे.

फेस्त फेरीतून आलेल्या रकमेची संपूर्ण माहिती मिळविण्यासाठी कुतिन्हो यांनी माहिती हक्क कायद्याखाली अर्ज केला आहे. या गैरवापर झालेल्या रकमेची मुख्यमंत्री डॉ. प्रमोद सावंत तसेच नगरविकास मंत्री विश्र्वजीत राणे यांनी चौकशी करावी, अशी मागणीही कुतिन्हो यांनी केली आहे.

सध्या मुख्याधिकारी हे मडगावचे आमदार दिगंबर कामत यांच्या व भारतीय जनता पक्षाच्या सरकारमागे ढालीप्रमाणे उभे आहेत व त्यांच्या सर्व गैरकारभाराकडे ते दुर्लक्ष करीत आहेत. हल्लीच त्यांनी कॉंग्रेसला लोहिया मैदानावर बैठक घेण्यास परवानगी नाकारली. तसेच अगदी मोडकळीस आलेल्या इमारतीत चपलाच्या शोरूमला बेकायदेशीररीत्या परवाना दिला. या घटना त्याचे उत्तम उदाहरण असल्याचे कुतिन्हो यांचे म्हणणे आहे.

फेस्त फेरीच्या वेळी नगरपालिकेतील त्या कर्मचाऱ्याने विक्रेत्यांकडून सोपो गोळा केला. त्यावेळी त्याने ती रक्कम आपल्या ‘गुगल पे’वर भरण्यास सांगितली व ती रक्कम नगरपालिकेच्या खात्यात जमा करण्याऐवजी आपल्या वैयक्तिक खात्यात जमा केली. अधिकृत माहितीप्रमाणे, २९२ स्टॉलांना परवाना देण्यात आला होता. सोपोद्वारे जी रक्कम गोळा करण्यात आली ती २७.६६ लाख रुपये एवढी आहे. यासंदर्भात माहिती हक्क कायद्याखाली संपूर्ण माहिती मागितल्याचे कुतिन्हो यांनी सांगितले.