पणजी: अल्पवयीन मुलीसोबत शारीरिक संबंध ठेवल्याच्या आरोपावरून अटक करण्यात आलेल्या एका तरुणाला पणजी येथील फास्ट ट्रॅक विशेष (पॉक्सो) न्यायालयाने सशर्त जामीन मंजूर केला. संशयित व पीडिता यांच्यात ‘प्रेमसंबंध’ होते आणि पीडितेने संशयिताच्या सुटकेस हरकत घेतलेली नाही, असे न्यायालयाने आपल्या आदेशात नमूद केले.

संशयिताला २२ सप्टेंबर २०२५ रोजी अटक करण्यात आली होती. तक्रारीनुसार, मार्च ते जून २०२५ या कालावधीत युवकाने १७ वर्षे ६ महिन्यांच्या मुलीसोबत शारीरिक संबंध ठेवले होते. ही तक्रार पीडित मुलीच्या आईने दाखल केली होती. भारतीय न्याय संहिता २०२३ च्या कलम ६४ तसेच बाललैंगिक अत्याचार प्रतिबंधक कायदा २०१२ मधील कलम ४, ८ आणि १२ अन्वये गुन्हा दाखल करण्यात आला आहे.

या जामीन अर्जाला विशेष सरकारी वकील अर्चना भोबे यांनी तीव्र विरोध नोंदवला. त्यांनी असा दावा केला की, हा गुन्हा ‘अमानवी व नैतिकदृष्ट्या निंदनीय’ असून, संशयिताला सोडल्यास तो पीडितेला, तिच्या कुटुंबाला किंवा साक्षीदारांना धमकावू शकतो.

तक्रारदाराच्या मुलीला सध्या आश्रयगृहात ठेवण्यात आले असून, गर्भपातातून मिळालेला गर्भ डीएनए तपासणीसाठी पाठविण्यात आल्याचेही त्यांनी नमूद केले. मात्र, अध्यक्षीय अधिकारी दुर्गा मडकईकर यांनी दोन्ही बाजूंचे युक्तिवाद ऐकल्यानंतर संशयितास सशर्त जामीन मंजूर करण्यास पात्र ठरवले.

तक्रार दाखल करण्यात उशीर

आदेशात नमूद केलेल्या प्रमुख कारणांमध्ये पीडितेने स्वतः अर्जास समर्थन दर्शवून कोणतीही हरकत घेतलेली नाही, संशयित व पीडिता यांच्यात प्रेमसंबंध असल्याचे बचाव पक्षाचे म्हणणे, तक्रार दाखल करण्यात उशीर झाला असून ती मुलगी वयात आल्यानंतरच तक्रार दिली गेली, प्रकरणातील तपास जवळपास पूर्ण झाला आहे आणि पीडितेच्या भावाविरुद्धही अशाच स्वरूपाचा स्वतंत्र गुन्हा बाल न्यायालयात प्रलंबित असल्याचे न्यायालयात स्पष्ट केले.