पणजी, ता. 19 (प्रतिनिधी): जुनेगोवे येथे होणाऱ्या सेंट फ्रांसिस झेवियर यांच्या पवित्र अवशेष दर्शन सोहळ्याला उपस्थित राहणाऱ्या मूळ गोमंतकीय वंशाच्या पाकिस्तानी नागरिकांचा ठावठिकाणा सहजपणे जाहीर केला जाऊ नये, अशी सूचना केंद्रीय गृह मंत्रालयाने राज्य सरकारला केली आहे.

राज्याच्या गृह खात्याने या नागरिकांनी दिलेल्या वास्तव्याच्या ठिकाणांची खातरजमा केल्यानंतरच त्यांना महिनाभराचाच व्हिसा देण्यात आला आहे. शंभरेक जणांनी दिलेल्या पत्त्यांची पडताळणी राज्याच्या पोलिस खात्याने केली आहे.

भारतासाठी थेट विमानसेवा नसल्याने पाकिस्तानी गोमंतकीयांची संख्या या खेपेला घटली आहे. जुन्या गोव्यात हे प्रदर्शन 21 नोव्हेंबरपासून सुरू होत आहे. बाकी सर्व भाविकांप्रमाणेच पाकिस्तानमधील गोमंतकीयांसाठी हा कार्यक्रम महत्त्वाचा आहे, मात्र यावर्षी पाकिस्तानमधून गोव्याला येणाऱ्यांचे प्रमाण कमी झाले आहे.

पाकिस्तानमधून भारतात थेट विमानसेवा उपलब्ध नसल्याने प्रवास अधिक कठीण आणि खर्चीक झाला आहे आणि यामुळे पाकिस्तानी गोमंतकीयांना इतर देशांतून, जसे की दुबई किंवा कतारमार्गे, भारतात यावे लागते. हे अधिक वेळखाऊ ठरते आणि खर्चही दुपटीने वाढतो.

गोमंतकीय वंशाच्या भाविकांना मातृभूमी भेटीची ओढ

पाकिस्तानमधील यात्रेकरूंनी गोवा आणि दमणच्या आर्कडीओसीसकडून निमंत्रण मागवून घेत त्याला व्हिसासोबत जोडून इस्लामाबादमधील भारतीय उच्चायुक्तालय अर्ज केला होता आता ते 28 नोव्हेंबर रोजी कराचीहून गोव्याला येण्याची प्रतीक्षा करीत आहेत. दुसऱ्या आणि तिसऱ्या पिढीतील गोमंतकियांचे काही वंशज कराचीमध्ये राहतात आणि म्हणूनच ते बऱ्याच काळानंतर पुन्हा गोव्याला जाण्याची अपेक्षा बाळगून आहेत.