Rohan Khaunte: गोव्याचे पर्यटन मंत्री रोहन खंवटे यांच्याकडे राज्यातील इतरही काही खात्यांचा कार्यभार आहे. खंवटे यांच्याकडे आयटी, प्रिटिंग आणि स्टेशनरी ही खातीदेखील आहे. खंवटे यांनी शुक्रवारी अचानक प्रिटिंग आणि स्टेशनरी विभागाला भेट दिली. त्यांच्या या अचानक भेटीने अनेक कर्मचाऱ्यांची तारांबळ उडाली. दरम्यान, या भेटीत खंवटे यांनी एका वरिष्ठ कर्मचाऱ्याला निलंबित केल्याचे समजते. तर जवळपास सात कर्मचाऱ्यांना कारणे दाखवा नोटीस पाठवल्याचे सांगितले जात आहे.

दरम्यान, या भेटीत मंत्री खंवटे यांना अनेक कर्मचारी गैरहजर असल्याचे दिसून आले. त्यावरून उपस्थित कर्मचाऱ्यांची मंत्री खंवटे यांनी झाडाझडती घेतली. लोकांच्या सेवेसाठी कर्मचारी येथे असून ते जर कार्यालयीन वेळेत कार्यालयात उपस्थित नसतील तर लोकांची कामे होणार कशी, असा जाब मंत्री खंवटे यांनी विचारला. यापुढे कर्मचाऱ्यांची असली बेफिकीर वृत्ती अजिबात खपवून घेणार नाही, असा इशाराही त्यांनी दिला आहे. दरम्यान, गैरहजर असलेल्या 7 कर्मचाऱ्यांना खंवटे यांच्या मंत्रालयाने कारणे दाखवा नोटीस बजावली आहे. या कर्मचाऱ्यांना त्यांचे लेखी उत्तर काही दिवसात द्यावे लागणार आहे.

याशिवाय बायंडर ग्रेड दोन पदावर कार्यरत असलेल्या एका कर्मचाऱ्याला निलंबित करण्यात आल्याचे समजते. हा कर्मचारी वारंवार गैरहजर असल्याचे समोर आले आहे. शिवाय अनुपस्थित राहण्याबाबत त्याने पूर्वकल्पना दिलेली नाही. किंवा वरिष्ठांकडून रजा मंजुर करून घेतलेली नसल्याचे समोर आले आहे. त्यामुळेच त्याच्यावर निलंबनाची कारवाई झाल्याचे समजते.

मंत्री खंवटे यांच्या या भेटीची आणि कर्मचाऱ्यांवरील कारवाईबाबतची बातमी राजकीय वर्तुळात आणि कर्मचारी वर्गात दिवसभर होती.