Digambar Kamat BJP statement: गोव्यातील भाजपचे प्रदेशाध्यक्ष दामोदर (दामू) नाईक यांच्या वाढदिवसाच्या कार्यक्रमातील एक व्हिडिओ सध्या सोशल मीडियावर प्रचंड व्हायरल झाला आहे. यामध्ये नवनिर्वाचित मंत्री दिगंबर कामत एका कार्यक्रमात असं काही बोलताना दिसत आहेत, ज्यामुळे नेटकऱ्यांना आश्चर्य वाटलेय. कामत बोलताना, 'गोव्यात भाजप आणखी १५ वर्ष येत नाही' असं म्हणत असल्याचे व्हिडिओमध्ये ऐकू येत आहे. या विधानामुळे अनेकांना प्रश्न पडला आहे की कामत असं का म्हणाले?

या व्हिडिओमध्ये मुख्यमंत्री डॉ. प्रमोद सावंत यांच्यासह अनेक आमदार आणि भाजपचे नेते उपस्थित आहेत. या सर्व वरिष्ठ नेत्यांसमोर मंत्री कामत यांनी भाजप आ नाही सकती आणि यासाठी उपयुक्त वातावरण दामू नाईक यांनी तयार करावे असे विधान केल्यामुळे व्हिडिओ जोरदार व्हायरल झाला. मात्र, या व्हिडिओमागे एक वेगळंच सत्य दडलं आहे जाणून घेऊया.

व्हिडिओमध्ये अर्थाचा अनर्थ

सोशल मीडियावर व्हायरल होणाऱ्या या व्हिडिओतील आवाजाची स्पष्टता कमी असल्यामुळे अर्थाचा अनर्थ झाला आहे. या व्हिडिओमध्ये मंत्री दिगंबर कामत हिंदीमध्ये बोलत आहेत. ते म्हणाले की, "जिसप्रकार भारत में भाजप हार नही सकती, वैसे गोवा में १५ साल भाजप हार नही सकती." हिंदीतील 'हार नही सकती' (हरू शकत नाही) हे शब्द ध्वनीच्या अस्पष्टतेमुळे 'आ नही सकती' असे ऐकू येत आहे.

खरं तर, कामत आचार्य प्रमोद कृष्णम यांच्या एका विधानाचा संदर्भ देत होते, ज्यात त्यांनी 'भाजपला पुढील २० वर्षे देशात कोणी हरवू शकत नाही ,' असे म्हटले होते. त्यावर कामत म्हणाले की, देशात २० जशी भाजप हरू शकत नाही, त्याचप्रमाणे गोव्यातही भाजप १५ वर्षे हरू शकत नाही. दामू नाईक यांनी अशी परिस्थिती निर्माण करावी, असे सांगत त्यांनी भाजपच्या ताकदीची प्रशंसा केली. मात्र, व्हिडिओतील चुकीच्या शब्दामुळे हा व्हिडिओ वेगळ्याच कारणांमुळे चर्चेत आला आहे.