पणजी : नुकतीच एप्रिल महिन्यात दरवाढ केल्यानंतर वारणा दूध संघाने आपल्या एक लिटर दुधाच्या बॅगमागे पुन्हा एकदा 2 रुपयांनी वाढ केली आहे. त्यामुळे ग्राहकांना आता 64 रुपयांना मिळत असणारे हायफॅट दूध 66 रुपयांना खरेदी करावे लागेल. परंतु दूध संघाने अर्धा लिटर पिशवीचे दर 25 रुपये कायम ठेवले आहेत.

परराज्यातील दूध दरवाढीचा गोव्यातीलही दुधावर परिणाम होत आला आहे. अद्याप गोवा डेअरची दूध आयात प्रक्रिया सुरू असल्याने ही प्रक्रिया पूर्ण होताच गोवा डेअरीला वाढीव दराने दूध खरेदी करावे लागू शकते.

गोवा डेअरीसाठी गोकुळ हा दूध संघ दूध पुरवठा करित होता. ग्राहकांची मागणी पूर्ण करण्यासाठी गोवा डेअरीला नेहमीच्या दूध संकलनातून शक्य होत नव्हते. त्यामुळे त्यांना परराज्यातील डेअरींकडून दूध घ्यावे लागते.

गोवा डेअरीने सोमवारी काढल्या निविदा

एप्रिलमध्ये महाराष्ट्रातील दूध दरवाढीनंतर गोवा डेअरीच्या दुधाचे दर वाढले होते. गोवा डेअरीने सोमवारी निविदा काढत दररोज एक टँकरची मागणी केली आहे. जो दूध संघ कमी दर देऊन पुरवठा करेल, त्यांना गोवा डेअरी प्राधान्य देईल, असे अध्यक्ष राजेश फळदेसाई यांनी सांगितले.