Goa Dairy : गोवा डेअरीच्या नूतन अध्यक्षांनी डेअरीचे हरवलेले वैभव परत मिळवून देण्याचे वचन दिले असतानाही, दिवाळीपर्यंतही त्यांची थकबाकी न मिळाल्याने दूध पुरवठा करणारे शेतकरी नाराज आहेत. दिवाळीचा सण सुरू झाला आहे आणि आमची प्रलंबित बिले गोवा डेअरीने मंजूर केली नसल्याने आम्ही तो साजरा करू शकत नाही, असं खंत शेतकऱ्यांनी व्यक्त केली आहे.

आमची गुरे राखण्यासाठी आम्हाला खूप खर्च करावा लागतो आणि आम्हाला आशा होती की सणासुदीच्या हंगामात आमची थकबाकी भरली जाईल, परंतु आजपर्यंत आमच्या खात्यात एक पैसाही जमा झालेला नाही, असे सांगत दूध उत्पादक शेतकऱ्यांनी आपली व्यथा मांडली.

महागाई आणि चाऱ्याच्या वाढत्या किमतींमुळे दूध उत्पादक शेतकऱ्यांच्या व्यवसायावर गंभीर परिणाम झाला आहे. लहान दूध उत्पादक शेतकऱ्यांवर बिलं थकल्याचा गंभीर परिणाम होत असून त्यामुळे व्यवसायात उत्पादनात घट झाल्याची तक्रार शेतकऱ्यांनी केली आहे.

सध्याच्या गोवा डेअरी संचालक मंडळाने शेतकऱ्यांचे हित जपायचे आहे, मात्र ते करण्यात अपयशी ठरल्याचे दूध शेतकऱ्यांचे म्हणणे आहे. प्रशासकाच्या कार्यकाळात अशी परिस्थिती निर्माण झाली असती तर त्याच संचालकांनी प्रशासकाची तक्रार केली असती, अशी पुस्तीही शेतकऱ्यांनी जोडली. सरकारने शेतकऱ्यांवर अन्याय केल्याचा आरोपही यावेळी दूध उत्पादक शेतकऱ्यांनी केला आहे. मात्र, गोवा डेअरीच्या अध्यक्षांशी याप्रकरणी बोलण्यासाठी संपर्क होऊ शकला नाही.