मायक्रोसॉफ्टच्या विंडोजमध्ये झालेल्या बिघाडाचा जगभरातील विमान कंपन्यांना फटका बसला. भारतातील इंडिगो कंपनीला देखील याचा फटका बसल्याने गोवा विमानतळावरील पाच फ्लाईट्स रद्द करण्यात आल्या तर काही उशीराने उड्डाण घेणार असल्याने प्रवाशांनी गोंधळ घातला.

दक्षिणेतील दाबोळी आणि उत्तरेतील मोपा या दोन्ही विमानतळांवर ही समस्या आल्याने प्रवाशांनी संताप व्यक्त केला.

मिळालेल्या माहितीनुसार, शुक्रवारी मनोहर आंतरराष्ट्रीय विमानतळावरुन उड्डाण घेणाऱ्या दोन आणि दाबोळी विमानतळावरील तीन फ्लाईट्स रद्द करण्यात आला आहेत.

मोपा विमानतळावरुन रात्री 8:40 वाजता मुंबईसाठी उड्डाण घेणारी फ्लाईट आणि 10:10 वाजता बंगळुरुला उड्डाण घेणारी फ्लाईट रद्द करण्यात आली. तर, बोर्डिंग पास आणि लगेज टॅग बायहँड दिल्याने इतर विमान उड्डाणासाठी विलंब झाल्याची माहिती सूत्रांनी दिली.

दाबोळी विमानतळावरील देखील काही फ्लाईट्ला विलंब झाला. दाबोळी विमानतळावर इंडिगो आणि एअर इंडिया एक्सप्रेसची कंप्युटराईज सिस्टिम सकाळी 10:10 वाजता काम करत नसल्याचे लक्षात आल्यानंतर तपासणी मॅन्युअली करण्यास सुरुवात केली.

इंडिगो कंपनीच्या दिवसभरातील २७ फ्लाईट्सपैकी तीन फ्लाईट्स (चेन्नई, अहमदाबाद आणि हैद्राबाद) रद्द करण्यात आल्या. तर, इंडिगो आणि एअर एक्सप्रेसच्या फ्लाईट्स एक ते दीड तास उशीर झाला, अशी माहिती विमानतळ अधिकाऱ्यांनी दिली.