पणजी : धर्मांतराच्या मुद्द्यावरुन विरोधी पक्षनेते आणि काँग्रेसचे नेते मायकल लोबो यांनी मुख्यमंत्री डॉ. प्रमोद सावंत यांच्यावर निशाणा साधला आहे. कोणत्या चर्चमध्ये धर्म परिवर्तन केले जाते ते मुख्यमंत्र्यांनी दाखवून द्यावे. मी त्यांच्यासोबत पाहणीसाठी जाण्यास तयार आहे अशा शब्दात लोबोंनी मुख्यमंत्र्यांना थेट आव्हान दिलं आहे. (Michael Lobo News Updates)

विरोधी पक्षनेतेपदाची जबाबदारी स्वीकारल्यानंतर मायकल लोबोंनी (Michael Lobo) सरकारविरोधात आवाज उठवण्यास सुरुवात केली आहे. शांततामय गोव्यात काही बाहेरील व्यक्ती येऊन ही शांतता भंग करून फूट पाडण्याचा प्रयत्न करत आहेत त्यापासून गोमंतकियांनी सावध राहावे. सरकारने त्याकडे कानाडोळा न करता त्याविरुद्ध योग्य पावले उचलण्याची त्यांची जबाबदारी आहे. पोलिस यंत्रणेने एखाद्या पक्षाचे ऐकून न घेता ही फूट होण्यास देऊ नये. सर्वांनी भारतीय घटनेतील नियमांचे पालन करण्याचे आवाहन मायकल लोबो यांनी केले.

यापूर्वी बाबासाहेब आंबेडकर जयंतीनिमित्त आयोजित कार्यक्रमातही लोबोंनी सरकारवर निशाणा साधला होता. डॉ. बाबासाहेब आंबेडकर (Babasaheb Ambedkar) यांनी घटनेत जे लिहिले आहे त्याचे सर्वांनी पालन करण्याची गरज आहे. त्याचे पालन न केल्यास भारतीयांमध्ये फूट पडेल. गेल्या काही दिवसांत राज्यात लहान - सहान घटना घडून राज्यातील शांतता भंग करण्याचा प्रयत्न झाला आहे त्याला बळी पडू नका. शांत असलेल्या गोव्यात (Goa) हिंसक प्रकार घडवून आणण्याचा प्रयत्न काही बाहेरील व्यक्तींकडून सुरू आहे. हे त्वरित रोखण्याची गरज आहे. तसे न झाल्यास राज्यातील शांतता नष्ट होईल. त्यामुळे असे हिंसक प्रकार घडू नयेत यासाठी लोकांनी एकजूट दाखवावी. अशा प्रकाराना पाठिंबा देऊ नये. राज्यातील वातावरण शांततामय राखण्याचे आवाहन विरोधी पक्षनेते मायकल लोबो यांनी केले.