पणजी: दयानंद सामाजिक सुरक्षा योजनेखालील (डीएसएसवाय) लाभार्थ्यांच्या घरातील अनुपस्थितीमुळे त्यांना दरमाह मिळणारे आर्थिक सहाय्य बंद करण्यात आले तर गेल्या तीन महिन्यांपासून लाभार्थ्यांना ते देण्यात आलेले नाही. विरोधी पक्षनेते मायकल लोबो यांनी समाजकल्याण खात्याला भेट देऊन अधिकाऱ्यांना धारेवर धरले. या लाभार्थ्यांचे प्रलंबित असलेले आर्थिक सहाय्य लेखा खात्यामध्ये जाऊन ते त्वरित वितरित करण्याच्या सूचना केल्या. डीएसएसवाय या योजनेखाली ज्येष्ठ नागरिक, विधवा व विकलांग यांना प्रतिमाह आर्थिक सहाय्य सरकारकडून दिले जाते; मात्र जानेवारी ते एप्रिलपर्यंत त्याचे वितरण अजूनही करण्यात आलेले नाही.

या योजनेखाली करण्यात आलेल्या सर्वेमध्ये लाभार्थी घरी सापडला नाही तर त्याचे नाव यादीतून गाळण्यात आले आहे. अशा अनेक तक्रारी विरोधी पक्षनेते मायकल लोबो यांच्याकडे आल्याने त्यांनी या प्रकरणाचा छडा लावण्यासाठी आज समाजकल्याण खात्याच्या अधिकाऱ्यांकडून माहिती जाणून घेतली. या चुकीच्या सर्वेप्रकरणी लाभार्थ्यांना फटका बसला असल्याने त्याला जबाबदार कोण असा जाब विचारला. किती जणांची नावे गाळण्यात आली व पुनर्चौकशीनंतर किती जणांची नावे पुन्हा यादीमध्ये समावेश करण्यात आली याची माहिती द्या असे त्यांनी सांगितले. या सर्वेवेळी सुमारे ३ हजार नावे गाळण्यात आली तर या प्रकरणी लाभार्थ्यांनी चौकशी केल्यानंतर 50 टक्के पुन्हा समाविष्ठ करण्यात आल्याचे अधिकाऱ्यांनी सांगितले.

खात्यातर्फे करण्यात येणाऱ्या चुकीच्या सर्वेमुळे लाभार्थ्यांना मात्र नाहक त्रास होत आहे. या योजनेचे बहुतेक लाभार्थी हे गरीब असून या रक्कमेतून काहीजण स्वतःचा औषधाचा खर्च तर काहीजण उदारनिर्वाह चालवित असतात. अचानक बंद झालेल्या आर्थिक सहाय्यामुळे त्यांना हालअपेष्टा सहन कराव्या लागत आहेत. या लाभार्थ्यांची पंचायतीच्या सरपंच, सचिव किंवा तलाठी यापैकी एकाकडून शहानिशा किंवा या तिघांपैकी एकाने दिलेले पत्र खात्याने ग्राह्य धरावे, अशी सूचना लोबो यांनी अधिकाऱ्यांना केली. नव्या पद्धतीनुसार खात्याचा एक कर्मचारी पंचायतीमध्ये जाऊन शहानिशा करत आहेत. यापुढे असे प्रकार सर्वेत घडण्याची शक्यता कमी आहे असे अधिकाऱ्यांनी माहिती दिली.

या प्रकरणी मुख्यमंत्र्यांना पत्र पाठवून लेखा खात्याला या लाभार्थींची आर्थिक सहाय्य रक्कम त्वरित वितरित करण्याची विनंती करणार असल्याचे लोबो यांनी सांगितले.