वाळपई: म्हादई नदीला पूर आल्यानंतर सावर्डे ग्रामपंचायत क्षेत्रातील सोनाळ, तार, कडतरी या गावांचा संपर्क नेहमी तुटतो. पुरावेळी येथील रस्ता पाण्याखाली जातो. त्यामुळे लोक अडकून पडतात. त्यामुळे सोनाळ ते तार कडतरी दरम्यानच्या रस्त्याची उंची वाढवण्याची आवश्‍यकता आहे, परंतु स्थानिक लोकप्रतिनिधी व सरकारने याकडे अक्षम्य दुर्लक्ष चालवले आहे. त्यामुळे येथील नागरिक प्रचंड नाराजी व्यक्त करीत आहेत.

तार, सोनाळ हा रस्ता सखल भागात आहे, त्यामुळे येथे पाणी मोठ्या प्रमाणात तुंबते. रस्ता पाण्याखाली जातो, तसेच रस्त्यालगत असलेल्या घराला देखील पाणी शिरते. या पावसाळ्यात आतापर्यंत तीनवेळा सोनाळ, कडतरी गावाचा संपर्क तुटला.

केवळ आडवाटेचा पर्याय...!

रस्ता पाण्याखाली गेल्यानंतर बाहेरगावी गेलेल्या लोकांना आपली वाहने तार गावच्या वेशीवर ठेवून आडवाटेने आपले घर गाठावे लागते. हा प्रकार आता नित्याचा झाला आहे.

बागायतींचे नुकसान

नदीला येणाऱ्या पुरामुळे सोनाळ, कडतरी या भागातील बागायती पिकांचे दरवर्षी मोठ्या प्रमाणात नुकसान होते. यंदाही बागायतींचे मोठे नुकसान झाले आहे. घुसल्याने बागायती पिकांनाही मोठा फटका बसत असतो.

सरकार मोठ्या दुर्घटनेची वाट पाहत आहे का?

सोनाळ येथील गणेश पर्येकर यांनी सांगितले की, तार येथे रस्त्यावर पाणी येणे हे आता नेहमीचेच बनले आहे. त्यामुळे येथील लोकांची नेहमी कुचंबणा होते. जंंगलातील आडवाटेने जावे लागते. तारपासून ते सोनाळ येथील मारुती मंदिरापर्यंतच्या रस्त्याची उंची वाढवण्याची गरज आहे. लोकप्रतिनिधी तसेच सरकारी यंत्रणांच्या नजरेस अनेकदा ही गोष्ट आणूनही याकडे दुर्लक्ष केले जात आहे. सरकार मोठ्या दुर्घटनेची वाट पाहत आहे का, असा प्रश्‍न त्यांनी उपस्थित केला.