राज्यात पुढील दोन दिवस तापमानवाढीची शक्यता हवामान खात्याने वर्तविली आहे. 22 ते 24 एप्रिल या कालावधीत तापमानात 2 अंश सेल्सियस वाढ होऊ शकते. त्यामुळे पारा 36 अंश सेल्सियसपर्यंत जाऊ शकतो.

उष्म्याचे प्रमाण कमी जास्त असले, तरी आर्द्रता वाढल्यामुळे अंगातून घामाच्या धारा वाहत आहेत. राज्यात काही ठिकाणी तुरळक सरी कोसळण्याची शक्यता हवामान खात्याने वर्तविली आहे.

राज्याच्या काही भागांत यापूर्वीही तुरळक सरी कोसळल्या आहेत. परंतु राजधानी व इतर परिसरात नागरिकांना अधून-मधून केवळ ढगाळ वातावरणाचा अनुभव येत आहे. त्यातच उष्मा अधून-मधून वाढत असल्याने अंगाची लाही लाही होत आहे.

ढगाळ वातावरणामुळे पाऊस पडणार आणि वातावरण आल्हाददायक होणार, अशी अटकळ बांधलेल्या लोकांची पुरती निराशा होत आहे.

मात्र, पुढील दोन दिवस तुरळक पाऊस पडण्याची शक्यता आहे. गुरुवारी राजधानी पणजीत किमान तापमान 35 तर कमाल तापमान 27 अंश सेल्सियस नोंदवण्यात आले. या कालावधीत पुरेसे पाणी पिणे, बाहेर काम करताना पुरेशी विश्रांती घेणे आणि बालक व वयोवृद्धांची काळजी घेण्याचे आवाहन हवामान खात्याने केले आहे.