हणजूण आणि काेलवा पाेलिसांनंतर आता कदाचित फोंडा पोलिसही संशयाच्‍या घेऱ्यात येण्‍याची शक्‍यता निर्माण झाली आहे.
२५ जून राेजी लोटली येथे वेर्णा औद्याेगिक वसाहतीजवळ कन्‍हैयाकुमार मोंडल (वय ३२ वर्षे) याचा अपघाती मृत्यू असा गुन्‍हा मायणा-कुडतरी पाेलिसांनी नोंदविला असला तरी मृतदेहाच्‍या मानेवर आणि पोटावर तीक्ष्‍ण हत्‍याराने वार केल्‍याचे दिसून आल्‍याने हा घातपाताचा प्रक़ार असण्‍याची शक्‍यता बळावली आहे.
२५ जून राेजी लोटली येथे वेर्णा औद्याेगिक वसाहतीजवळ या इसमाचा मृतदेह सापडला हाेता. मायणा-कुडतरी पोलिसांनी सुरुवातीला हा ‘हिट ॲण्‍ड रन’ अपघात असे नाेंद करीत अपघाती मृत्‍यूची केस नाेंद केली हाेती.
मात्र, या मृतदेहाची उत्तरीय तपासणी केल्‍यानंतर त्‍याच्‍या मानेवर तीन, पाेटावर दोन तसेच हातावर दोन तीक्ष्‍ण हत्‍याराने वार केल्‍याचे आढळून आले. शिवाय त्‍याचा एक कान कापलेल्‍या अवस्‍थेत होता. यासंबंधीचा अहवाल दक्षिण गाेवा जिल्‍हा इस्‍पितळातून मायणा-कुडतरी पाेलिसांना सादर केला आहे.
यासंदर्भात मडगावचे उपअधीक्षक संतोष देसाई यांना विचारले असता, उत्तरीय तपासणी अहवालात या जखमा आढळल्या आहेत. मात्र, या जखमा कुणी वार केल्‍यामुळे झाल्‍या, की वाहनाचा धक्‍का बसून झाल्‍या याचा आम्‍ही तपास करीत आहाेत. अद्याप हे प्रक़रण अपघाती मृत्यू म्‍हणूनच नोंद आहे.
कन्‍हैयाकुमार याला फाेंडा पोलिसांच्‍या रॉबर्ट व्‍हॅनने लाेटली येथे आणून सोडले होते, अशी माहिती प्राप्‍त झाली आहे. यासंदर्भात मायणा-कुडतरी पाेलिसांनी रॉबर्ट व्‍हॅनचालकाची जबानीही नोंद केली आहे. त्‍यात त्‍याने एका हवालदाराच्‍या सांगण्‍यावरून कन्‍हैयाकुमारला लाेटली येथे आणून सोडले, असे सांगितले.
सूत्रांकडून मिळालेल्‍या माहितीनुसार, कन्‍हैयाकुमार हा फाेंडा येथील मारुती मंदिराजवळील झोपडपट्टीत राहात हाेता. ताे काहीसा मनोरुग्‍ण हाेता. २५ जूनच्‍या आदल्‍या रात्री तो रस्‍त्‍यावरील वाहनचालकांना त्रास देतो, अशी तक्रार फोंडा पोलिसांकडे आल्‍यानंतर त्‍याला रॉबर्ट व्‍हॅनमध्‍ये कोंबून लोटली येथे आणून सोडले होते.
मात्र, हा इसम जर फाेंड्याचा हाेता, तर त्‍याला घरी नेऊन न सोडता लाेटली येथे का सोडले आणि त्‍याला सोडल्‍यानंतर त्‍यांच्‍या अंगावर या जीवघेण्‍या जखमा कशा आढळल्या, असे प्रश्‍न निर्माण झाले आहेत.
पोलिसांनीच कन्‍हैयाकुमारला लोटलीत आणून सोडले
विशेष बाब म्‍हणजे, कन्‍हैयाकुमार हा फाेंडा बाजारात राहणारा असून त्‍याला लोटली येथे फोंडा पोलिसांच्‍याच राॅबर्ट गाडीतून लाेटलीत आणून सोडले होते, अशी धक्‍कादायक माहिती पुढे आली आहे. पाेलिसांनी त्‍याला अशा अनाेळखी जागी का आणून सोडले आणि त्‍यानंतर त्‍याची हत्‍या कशी झाली, हे प्रश्‍न आता ऐरणीवर आले आहेत.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.