वास्को: मुरगाव पालिकेचे नगराध्यक्ष लिओ रॉड्रिक्स व नगरसेवकांनी विसर्जन स्थळाची पाहणी करून त्या ठिकाणी श्री गणेश विसर्जन करण्यास कोणत्याही प्रकारची अडचण होणार नाही याची दक्षता घेतली.

(Mayor of Mormugao Municipality Leo Rodrigues inspected the Ganesha idol immersion site)

बुधवार (दि.३१) रोजी साजरा होणाऱ्या श्री गणेश चतुर्थीची तयारी अंतिम टप्प्यावर पोचली असून घरघरात तसेच, सार्वजनिक स्थळे सार्वजनिक गणेशोत्सव मंडळांनी तयारी चालू ठेवली आहे. वास्को सर्वत्र जय्यत तयारी सुरू आहे. दरम्यान दीड, पाच, सात, अकरा दिवसांचे गणपतीचे पूजन केल्यानंतर श्रींचे विसर्जन कृत्रिम तळीत, दर्यात विहिरीत केले जाते.

वास्को बहुतेक गणेश विसर्जन बायना समुद्रकिनारी, खारीवाडा येथे समुद्रात, वाडे तळ्यात केले जाते. या ठिकाणी शेकडो गणेश मुर्ती विसर्जित केले जातात. दरम्यान मुरगावचे नगराध्यक्ष लिओ रॉड्रिक्स तसेच नगरसेवक दीपक नाईक, उपनगराध्यक्ष अमेय चोपडेकर, नगरसेविका श्रद्धा महाले, यतिन कामुर्लेकर, रामचंद्र कामत यांनी आज सकाळी बायणा व खारीवाडा येथे समुद्रकिनारी विसर्जन स्थळाची पाहणी केली.

या ठिकाणी झालेला कचरा, वाढलेली झाडे, झुडपे कापण्याची सूचना केली. तसेच गॅमन इंडिया कंपनी अधिकाऱ्यांना विसर्जन स्थळी हाय मास्ट लाईट घालण्याची विनंती केली. त्यांनी ती मान्य केली. विसर्जन स्थळी कोणत्याच प्रकारची कमतरता भासणार नाही याची दक्षता घेणार असल्याचे नगराध्यक्ष लिओ रॉड्रिक्स यांनी सांगितले.