Mayem Van Accident: मये येथे रस्त्याच्या बाजूला असलेल्या फणसाच्या झाडाला व्हॅनची धडक बसून चालक गंभीर जखमी झाला. तर व्हॅनची पूर्णतः मोडतोड झाली. या अपघातात गंभीर जखमी झालेला युवक पैरा येथील असून, त्याचे नाव गणेश घाटवळ असे असल्याची माहिती मिळाली.

त्याच्यावर सध्या बांबोळी येथील गोमेकॉत उपचार चालू आहेत. त्याची प्रकृत्ती चिंताजनक असल्याची माहिती मिळाली आहे.

मये-पैरा रस्त्यावरील अर्धवाडा-मये परिसरात शुक्रवारी (ता.२५) रात्री 11.30 वाजण्याच्या सुमारास हा अपघात घडल्याची माहिती स्थानिकांकडून मिळाली आहे. चालकाचे नियंत्रण गेल्याने हा अपघात घडल्याचा अंदाज व्यक्त करण्यात येत आहे.

यासंबंधीची उपलब्ध माहिती अशी, की जीए-०४-ई-३६७१ या क्रमांकाची व्हॅन पैराच्या दिशेने जाताना अर्धवाडा-मये येथे रस्त्याच्या डाव्या बाजूला असलेल्या फणसाच्या झाडाला व्हॅनची धडक बसली.

धडक एवढी जबरदस्त होती, की आवाजाबरोबर शेजारील घरांतील लोक जागे झाले. त्यांनी बाहेर धाव घेऊन गाडीत अडकलेल्या चालकाला बऱ्याच प्रयत्नाअंती बाहेर काढून लागलीच उपचारार्थ इस्पितळात नेण्यात आले.

अपघात घडला, त्यावेळी चालक सोडल्यास व्हॅनमध्ये कोणीच नव्हते, अशी माहिती मिळाली आहे.